Almatydaǵy Qurmanǵazy atyndaǵy Qazaq ulttyq konservatoriiasynda Qazaq KSR-iniń halyq ártisi, professor, kásibi qobyz óneriniń negizin qalaýshy Fatima Balǵaevanyń 100 jyldyǵyna arnalǵan mereitoilyq is-sharalar ótti. Bul týraly Mádeniet jáne aqparat ministrliginiń baspasóz qyzmeti jazdy, dep habarlaidy Ult.kz.
Is-shara baǵdarlamasy aiasynda áigili qobyzshy turǵan úige eskertkish taqta ornatyldy. Sondai-aq, kórnekti óner qairatkeriniń shyǵarmashylyq murasyn keńinen dáripteý maqsatynda E.Rahmadiev atyndaǵy Úlken kontsert zalynda «Fatima Balǵaeva – qobyz óneriniń padishasy» atty kontsert uiymdastyryldy.
Kesh barysynda óner iesiniń otbasy Fatima Balǵaevanyń dombyrasy men qobyzyn Qurmanǵazy atyndaǵy Qazaq ulttyq konservatoriiasyna syiǵa tartty. 45 jyl boiy otbasy qorynda saqtalǵan qobyz mereitoi qarsańynda arnaiy restavratsiiadan ótkizildi. Mereitoilyq keshte Fatima Balǵaevanyń shákirti, QR Mádeniet salasynyń úzdigi, Kúlásh Baiseiitova atyndaǵy Qazaq ulttyq óner ýniversitetiniń dotsenti Kenjegúl Musaeva tarihi aspapta tańdaýly shyǵarmalardy oryndady.
Sonymen qatar «Fatima Balǵaeva: qobyz mektebiniń oryndaýshylyq óneri men dástúrleri» taqyrybynda halyqaralyq ǵylymi-praktikalyq konferentsiia ótkizildi. Konferentsiia barysynda estelik fotoalbom men «Qobyzǵa arnalǵan pesalar» atty notalyq jinaq tanystyryldy. A.Jubanov atyndaǵy kishi zaldyń foiesinde Fatima Balǵaevanyń biýsti ashyldy.
Fatima Balǵaeva – qazaq mýzyka óneriniń damýyna eleýli eńbek sińirgen tulǵa. Ol «Qobyz jáne baian» kafedrasynyń tuńǵysh meńgerýshisi bolyp, qobyzdyń akademiialyq oryndaýshylyq mektebiniń negiz qalady. Ustazdyq pen shyǵarmashylyqty qatar ushtastyrǵan óner iesi kásibi mýzykanttardyń birneshe býynyn tárbieleýge de ólsheýsiz úles qosty.
