Almatyda Alataý aýdanyna qarasty Alǵabas yqshamaýdanyndaǵy uzyndyǵy 4 shaqyrymnan asatyn burynǵy Aqsai kóshesine Fariza Ońǵarsynova esimi berildi.
Kósheniń saltanatty ashylý rásimine halyq jazýshysynyń jerlesteri, týystary, kózin kórgen áriptesteri men Almaty qalasy ákimdiginiń ókilderi jinaldy. Olar qazaqtyń aqyn qyzy Farizanyń ómiri men shyǵarmashylyǵyn eske aldy, – dep habarlaidy Almaty.tv.
«Atyraýda aspanmen talasqan úlken eskertkish qoiyldy. Elordamyzda Nur-Sultan qalasynda kóshesi ashyldy. Dál sol sekildi mereili belesine orai Almaty qalasynda da dál sondai sharanyń bir kýási bolyp otyrmyz. Fariza apamyzǵa kóshe beriler kezde bul barlyq deńgeilerde eldiń bir aýyzdanmoiyndaǵandyǵyn kórsetti" dedi Almaty qalasy ákiminiń keńesshisi Mamai AHETOV.
Qazaq ádebietine «Sandýǵash», «Mańǵystaý marjandary», «Mazasyz shaq» sekildi óleńder jinaǵyn ákelgen aqyn shyǵarmashylyqpen qatar jaýapty qyzmetterdi qatar atqardy. Este bolsa, 1996-shy jyldan 2004-shi jylǵa deiingi aralyqta Qazaqstan Respýblikasy Parlamenti Májilisiniń birinshi jáne ekinshi shaqyrylymdarynyń depýtaty bolǵan.
«Keibireýler «Farizanyń betine qarasań, qorqasyń» dep aitatynǵa uqsaidy. Biraq onyń náziktigin kóp adam bile bermeidi. Ol kisiniń syrty tútin bolǵanymen, ishi jyly bolatyn. Sondyqtan, Almatynyń búgingi aýa raiy sol sharaǵa bailanysty salystyrǵanym ǵoi endi. Mamamdy menen artyq biletin adam joq shyǵar» deidi Fariza Ońǵarsynovanyń uly Aibar OŃǴARSYNOV.
Izin ala, jinalǵandar qazaq áieliniń jan syryn ashqan aqynnyń ózi turǵan úidiń qabyrǵasyna ilingen eskertkish taqtaǵa gúl shoqtaryn qoidy.
Urpaqty ultjandylyqqa, adamgerishilikke úiretetin qazaq poeziiasy padishasynyń biyl týǵanyna 80 jyl toldy. Shara sońy Muhtar Áýezov atyndaǵy drama teatrynda saltanatty keshke ulasty.
