Almatyda Eýropa kinosynyń aptalyǵy bastaldy, dep habarlady "Almaty" telearnasy.
Telearnanyń habarlaýynsha, dástúrli sharada Ulybritaniia, Majarstan, Germaniia jáne Frantsiianyń kinokartinalary kórsetiledi. Dástúrli sharanyń shymyldyǵyn ulybritaniialyq rejisser Stiven Lavridjdiń "Matangi/Maiia" atty derekti filmi ashty. Kinokartinada Shri-Lankanyń týmasy Matangi Arýlpragasamnyń ómiri týraly baiandalady. Tanymal ánshi týraly týyndy TMD aýmaǵynda tuńǵysh ret kórsetilip otyr.
"Kezekti Eýropa kinosynyń aptalyǵynda burynǵydan qysqa formatty tańdadyq. Aptalyqta eńbek jolyn endi bastap jatqan jas rejisserlardyń týyndylary kórsetiledi. Olardyń filmderi osy ýaqytqa deiin kinosynshylardyń joǵary baǵasyn alǵan. Sondai-aq, talai halyqaralyq kinofestivalde júldelerdi ielengen", - dedi Britan keńesi marketing jáne qoǵammen bailanys jónindegi menedjeri Elena Sim.
Uiymdastyrýshylardyń aitýynsha, ár kórermenniń qalaýyna sai keletindei túrli janrdy qamtityn baǵdarlama qurylǵan. Aptalyq aiasynda nemis rejisseriniń "Qatarlar arasynda", "Kún sáýlesin kirgiz" melodramasy jáne "Iýpiterdiń jerserigi" atty filmder kórsetiledi. Jalpy, shara aiasynda kári qurlyq memleketteriniń asa tanymal 4 kinotýyndysy kórsetiledi.
Arnaiy iriktelgen kartinalardyń barlyǵy eýropalyq bolmystan syr shertip, ondaǵy halyqtyń tynys-tirshiligin baiandaidy.
Aita keteiik, Eýropa kinosynyń aptalyǵy 27 mamyrǵa deiin ótedi. Eýropanyń shynaiy beinesin jańa qyrynan tanytatyn tyń kartinalar "Arman" kinoortalyǵynda kórsetiledi. Jurtshylyq nazaryna usynylatyn barlyq týyndylar orys tilindegi sýbtitrlarmen túpnusqada beriletin bolady.
