Almatyda Eýropa elderi men Reseiden kelgenderge baqylaý kúsheitildi. Bul týraly óńirlik kommýnikatsiialar qyzmetiniń baspasóz máslihatynda Jandarbek Bekshin málim etti, dep habarlaidy QazAqparat.
Onyń aitýynsha, kóliktegi sanitarlyq-epidemiologiialyq baqylaý basqarmasynyń epidemiolog mamandary men meditsina qyzmetkerleri osy elderden Almaty halyqaralyq áýejaiyna kelgenderdi baqylaýdy kúsheitti.
Shetelden kelgen barlyq jolaýshylar joǵary temperatýrany tirkeitin arnaiy quralmen skanerlenedi.
«Resei Federatsiiasyndaǵy jaǵdai kúrdelene tústi, biz Eýropa men Reseiden kelgenderdi baqylaýdy kúsheittik, óitkeni onda qazir aýrýdyń kúrt óskeni baiqalady. Rýmyniiada, Ulybritaniiada jáne Baltyq elderinde antirekord tirkeldi. Halyq qazirgi ýaqytta ainalymdaǵy delta shtamyna jete mán berýi kerek. Eger buryn diareia siiaqty KVI simptomy basym bolsa, búginde oǵan neirotoksikalyq sindrom qosyldy, bul - este saqtaý qabiletiniń nasharlaýy. Naýqastar aýrýhanaǵa túsken kezde esin joǵaltady. Bas miy zaqymdanady, aýyryp jazylǵan adamdy postkovid sindromy mazalaidy», - dep túsindirdi Jandarbek Bekshin.
Sonymen qatar, ol qaýip aimaǵynda áli kúnge deiin aýrýdy qiyndatatyn qart adamdar bar ekenin aitty.
«Eń kóp juqtyrǵandar - 20-39 jastaǵy azamattar, olar aptasyna juqtyrǵandardyń 28%-yn quraidy, 24% - 40-59 jastaǵy turǵyndar, 25% - 60 jastan asqan adamdar. Sońǵy aptada balalar men jasóspirimder arasynda aýrý kórsetkishiniń 2,6% óskeni baiqalady», - deidi Almatynyń bas sanitar dárigeri.
Jandarbek Bekshin vaktsinalanýdy keiinge qaldyrmaýǵa, adamdar kóp jinalatyn oryndarǵa, túngi klýbtarǵa, meiramhanalarǵa barýdy, úi is-sharalaryn ótkizýdi shekteýge shaqyrdy.
«Qazir immýndyq qabat 54% paiyzǵa jetti. Eger osyndai qarqyndy saqtap qalatyn bolsaq, onda vaktsinatsiia merzimi jyl sońyna deiin sozylyp, 70%-ǵa jetýi múmkin», - dedi spiker.
