Almatyda sintetikalyq esirtkini óndirýge arnalǵan shikizattyń iri kólemi tárkilendi, dep habarlaidy QazAqparat.
Almaty qalalyq politsiia departamentiniń málimetinshe, esirtki daiyndaityn tseh «Qalqaman» yqshamaýdanyndaǵy jeke úidiń jertólesinde jumys istegen. Belgili bolǵandai, úi ótken jyldyń qazan aiynda jas jigitke ai saiynǵy 300 myń teńgege jalǵa berilgen.
«Ruqsat etilgen tintý kezinde untaq jáne kesek túrindegi zattar, plastik ydystar, elektrondy tarazylar jáne mefedron sintetikalyq psihotroptyq zatyn óndirý kezinde qylmyskerler paidalanǵan basqa da dúnieler tárkilendi. Esirtki shyǵarýǵa jaýapty – 23 jastaǵy O.esimdi azamat. Aiaqtalmaǵan meditsinalyq bilimi bar jas jigit, esirtki óndirisin jolǵa qoiǵan. Jalpy, esirtki zerthanasynan birneshe keli keptirilgen shóp tárkilendi. Sotqa deiingi tergeý bastaldy», – dedi Almaty qalalyq politsiia departamenti bastyǵynyń orynbasary Berik Ábilbekov.
Politsiia qyzmetkerleri jedel túrde esirtki biznesine taǵy bes adamnyń qatystylyǵyn anyqtady, olardyń ekeýi 23 jáne 19 jastaǵy qyzdar.
Olar – Túrkistan jáne Almaty oblystarynan kelgen. Olardyń mindetterine daiyn esirtkilerge betbelgi qoiý kirdi. Kúdiktiler qamaýǵa alyndy.
«Qylmysty uiymdastyrýshynyń aitýynsha, ol Telegram-daǵy kýratordyń nusqaýy boiynsha áreket etken. Zerthanaǵa arnalǵan quramdas bólikterdi Almaty oblysy Talǵar aýdany aýmaǵyndaǵy «betbelgiler» arqyly alǵan. Bir apta ishinde ol 2-3 kelige jýyq sintetikalyq esirtki jasaǵan, jumysy úshin bitkoinmen apta saiyn 280 myń teńge kóleminde qarajat alyp otyrǵan. Saraptama qorytyndysy boiynsha, tárkilengen zattar jalpy salmaǵy 4 keliden asatyn «A-PVP» sintetikalyq esirtki zaty, mefedron – 312 gramm jáne 15 litr týlýol (prekýrsor). Shikizat baǵasy – 150 mln teńge», – dedi Ábilbekov.
