Almaty qalasynyń ákimi Baqytjan Saǵyntaev ońtústik astanada jeńilrelsti kólik júrgizý jobasyna qatysty oiyn aitty, dep habarlaidy QazAqparat.
«Qurylysty bastamas buryn bárin esepteý kerek. Jobanyń quny qansha bolady? Kim aqsha beredi? Qurylǵan joba bar. Qurylys-montajdaý jumysynyń jobasyna sáikes, bul maqsatta 123 mlrd teńge kerek. Al ol qarajatty qaidan tabamyz? Bul jumys memlekettik-jekemenshiktik áriptestik aiasynda bolyp, qarajatty bir jerden tartyp, keiin qaitarý kerek bolady», - dedi Baqytjan Saǵyntaev OKQ-da tilshilerdiń suraǵyna jaýap bere otyryp.
Ákimniń aitýynsha, jeńilrelsti kóliktiń biletteri basqa kólikterge qaraǵanda qymbatyraq.
«Jol aqysy qansha bolady? Búgingi tańda trolleibýstar, avtobýstar men metro sýbsidiialanady. Sýbsidiia úshin ǵana jyl saiyn 30 mlrd teńge jumsalady. Qanshama qarajat ekenin eseptei berińiz. Sol sebepti, LRT salyna qalsa, sózsiz, bilet te qymbattap keteri anyq. Taǵy sýbsidiialaýǵa týra keledi. Osylaisha, baǵa birneshe ese ósedi. Sol úshin bárin eseptep alý kerek», - dedi Baqytjan Saǵyntaev.
Qala basshysy LRT-niń qazirgi jobasy Ulttyq ekonomika ministrliginiń MJÁ ortalyǵynda qaralyp jatqanyn jetkizdi.
«Eger biz usynǵan qarjylyq modeldi qoldasa, isti bastamai turyp, qarajattyń qaidan alynatynyn, qalai qaitarylatynyn birden sheship alǵan abzal. Barlyq satydan ótsek, máseleniń mánisin naqty uǵynarymyz anyq. Nelikten MJÁ ortalyǵy arqyly jobany tekserip alyp otyrmyz? Sebebi, ol maqsatta alǵan qarajatty qala biýdjetiniń esebinen qaitarý múmkin emes», - dedi ol.
