Almatyda metronyń artqy jaǵynan jabysyp alyp júrgen adamǵa qatysty shara qoldanylady, dep habarlaidy "Ult aqparat".
Bul video 2 qarashada «SHERIFF Almaty» arnasynda «Zatsep metro Almaty» degen ataýmen jariialanǵan. Video avtory poiyzdyń art jaǵyndaǵy tirkemesine jabysyp alyp, «Almaly» stansasynan bastap «Abai» stansasyna deiin jetken.
«Metropoliten» MKK baspasóz qyzmeti bul oqiǵaǵa qatysty túsinik berdi.
«Jolaýshylarǵa qyzmet kórsetetin kezekshi bul kezde qarama qarsy platformada ketken jolaýshylardy shyǵaryp salyp turǵan. Osy ýaqytty paidalanyp bloger poiyzǵa jabysyp alyp ketip qalǵan. Qaýipti eksperiment videokameralarǵa túsip qaldy», - dedi baspasóz qyzmetinen.
«Metropoliten» MKK bul derekke qatysty politsiiaǵa shaǵymdandy.
«Video avtory tek qana ózi ǵana emes, ózgelerdiń ómirine de qaýip tóndirgen. Sondai-aq, buzaqylyqtyń kesirinen poiyzdardyń júrý kestesi buzylýy múmkin boldy», - dedi baspasóz qyzmetinen.
