Almatyda ekinshi halyqaralyq jazýshylar forýmy bastaldy. Forýmda sarapshylar kórkem ádebi aýdarmalar men jazýshylardyń bailanysy jónindegi problemalardy talqylady, dep habarlaidy QazAqparat.
Halyqaralyq sharaǵa 18 memleketten 81 delegat qatysýda. Frantsiia, Germaniia, AQSh, Angliia, Túrkiia, Qytai, Mońǵoliia, Resei, Marokko, Litva, Ózbekstan, Ázerbaijan, Qyrǵyzstan jáne basqa da elderden kelgen jazýshylar, pýblitsister, aýdarmashylar, ádebi synshylar, sýretshiler kórkem ádebi aýdarmadaǵy problemalardy kóterdi.
«Osy forýmda biz óte mańyzdy taqyrypty qozǵaimyz. Iaǵni kórkem aýdarmaǵa arnaimyz. Jazýshylardyń barlyǵy derlik kúnderdiń kúninde aýdarma problemasyna betbe-bet keleri anyq. Jazýshylar ulttyq ádebietti jasasa, aýdarmashylar álemdik ádebietti jasaidy dep beker aitylmaǵan»,-dedi qazaq PEN-klýbynyń prezidenti Bigeldi Ǵabdýllin.
Alqaly forýmnyń jumysy memlekettik «Rýhani jańǵyrý» baǵdarlamasyn júzege asyrýǵa baǵyttalǵan. Qazaq PEN-klýbynyń prezidenti Bigeldi Ǵabdýllinniń pikirinshe, ulttyq ádebietti jańǵyrtý úshin aldymen halyqaralyq bailanystar ornatý qajet. Forým taqyrybynyń «Álemdi ashý – álemge ashylý. «Kórkem ádebi aýdarmalar men jazýshylar bailanysynyń problemalary», - dep atalýy da sondyqtan.
«SSSR kúiregen soń búkil álemde sovet halqynyń mádenietine degen qyzyǵýshylyq kúrt quldyrady. Sońǵy 25 jylda bizdiń eki-úsh ádebietshiden ózge birde-bir tanymal qazaq jazýshysy álemdik deńgeiden kórine almady, óitkeni ózge tilge aýdarylǵan shyǵarmasy joq», - dedi ol.
Forýmǵa qatysýshylar, bul halyqaralyq shara jazýshylardy jaqyndastyryp, olardyń kásibi qyzyǵýshylyǵyn arttyryp, ózge elderdiń zamanaýi ádebietin bilýge, aýdarmashylar men áriptester tabýyna yqpal etetinine senimdi.
