Almatyda birden eki oq-dári qoimasy tabyldy, dep habarlaidy QazAqparat.
Almaty qalalyq politsiia departamentiniń málimetinshe, Medeý aýdanyna qarasty Núsipbekov kóshesindegi úilerdiń biriniń aýlasynan Kalashnikov avtomatynyń 5,45 kalibrli 20 patrony tabyldy.
«Ekinshi qoima Alataý aýdanynan tabyldy. Qulaǵan aǵashtyń tamyryna «Makarov» tapanshasynyń 40 patrondary salynǵan polietilen paketi jasyrylǵan. Tabylǵan oq-dáriler osy jyldyń qańtar aiynyń basynda Almatyda bolǵan jappai tártipsizdikter kezinde qylmystyq jolmen alynǵan bolýy múmkin. Eki derek te QR QK-niń 287-baby boiynsha aýmaqtyq Politsiia basqarmalarynda sotqa deiingi tergeýdiń biryńǵai tizilimine tirkeldi», – dedi Almaty qalalyq PD Esirtki qylmysyna qarsy kúres basqarmasynyń bastyǵy Erlan Álmaǵambetov.
Politsiia ókiliniń aitýynsha, tabylǵan oq-dáriler tárkilenip, qylmystyq is materialdaryna tirkeldi.
Oq-dárilerdi jasyrǵan adamdardy anyqtaý jumystary júrgizilip jatyr.
