Almatyda koronavirýs juqqan eki naýqas ókpeni jasandy jeldetý apparatyna qosylǵan. Bul týraly 2 sáýirde qalalyq qoǵamdyq densaýlyq saqtaý basqarmasynyń jetekshisi Tileýhan Ábildaev habarlady.
"Apparatqa qosylǵan bir naýqasta obstrýktivti ókpe aýrýy men antibiotikterge allergiialyq reaktsiiasy bary anyqtaldy. Ekinshi naýqasta pnevmoniia bar. Sol sebepti jaǵdailary aýyr" dedi Ábildaev.
Onyń aitýynsha, Almatyda koronavirýs juqqan 80 naýqastyń 68-iniń jaǵdaiy - qanaǵattanarlyq, on adamnyń jaǵdaiy - ortasha aýyr. Bir adam jazylyp shyqty.
Qalada naýqastarmen bailanysta bolǵan 619 adam (81 bala) provizorlyq statsionarda jatyr. Úi karantininde 3853 adam bar.
Almatyda jalpy 90 adamnan koronavirýs tabylǵan. 11 adam jazylǵan. Olardyń arasynda 2 jasar bala da bar.
Almaty - virýs juqtyrǵandar sany jaǵynan respýblikada Nur-Sultannan (191) keiin ekinshi orynda tur. 19 naýryzda qalada karantin jariialanyp, qalaǵa kirip-shyǵýǵa tyiym salyndy. 28 naýryzda adamdardyń syrtqa shyǵýyna shekteý qoiyldy. Qala turǵyndary azyq-túlik, dári-dármek satyp alý siiaqty óte qajetti jaǵdaida ǵana kóshege shyǵa alady. Qalada azyq-túlik dúkenderi, dárihanalardan basqa nysandar jabyq.
