Qazaqstan Densaýlyq saqtaý ministrliginiń 27 naýryz 20.00-degi deregine sai, Almatyda taǵy eki adamnan virýs tabyldy. Qazir bul qalada 50 adam dertke shaldyqqan.
Al elde qazir 137 adamǵa virýs juqqany anyqtaldy: Almatydan bólek Nur-Sultanda - 69 adam, Qaraǵandyda - tórt adam, Jambyl oblysynda - úsh adam, Shymkentte - eki adam, Almaty oblysynda - bir adam, Aqtóbe oblysynda - bir adam, Soltústik Qazaqstan oblysynda - bir adam, Atyraý oblysynda - úsh adam, Pavlodar oblysynda, Mańǵystaý oblysynda bir adam.
26 naýryz keshkisin Nur-Sultanda 64 jastaǵy bir áiel adam Covid-19 dertinen qaitys boldy. Onyń koronavirýs juqtyrǵany qaitys bolǵan soń anyqtalǵan. Elde barlyǵy úsh naýqas: Almatyda - eki, Nur-Sultanda bir adam dertten aiyqty. Olardyń biri - 12 jasar qyz bala.
27 naýryzda Pavlodar, Atyraý jáne Mańǵystaý oblysynda koronavirýs alǵash ret tirkeldi.
Qazaqstanda koronavirýsqa bailanysty 15 sáýirge deiin tótenshe jaǵdai. 19 naýryzdan bastap Almaty men Nur-Sultan qalalary karantinge kóshti.
Al 28 naýryzdan bastap eldegi iri úsh qalada - Almaty, Nur-Sultan, Shymkentte shekteýler kúsheiedi:
- Endi úsh qaladaǵy jurt jumysqa, azyq-túlik jáne dári alýǵa ǵana shyǵa alady.
- Park, jaiaý júrginshiler kóshesi, jaǵalaýlar, oiyn alańdary jabylady.
- Qoǵamdyq kólikterdiń jumysy shektele bastaidy.
- Qoǵamdyq oryndarda úsh adamnan artyq jinalýǵa bolmaidy. Bul shekteýdiń bir otbasynyń adamdaryna qatysy joq.
- Balalar eresektersiz kóshege shyǵýǵa tyiym salynady.
Ótken jyldyń sońynda Qytaida alǵash ret tirkelgeli beri álemde koronavirýs juqtyrǵanar jarty millionnan asyp ketti. Dúniejúzilik densaýlyq saqtaý uiymy Covid-19 koronavirýsyn "pandemiia" dep jariialaǵan.
