Foto: Polisia.kz
Almatyda agressivti júrgizý men qaýipti manevrlerge qarsy kúres kúsheitilip, drift jasaǵan júrgizýshiler jaýapkershilikke tartyldy. Bul týraly Polisia.kz habarlady.
Qalalyq politsiianyń málimetinshe, ótken demalys kúnderi jol qozǵalysy erejelerin óreskel buzǵan eki júrgizýshi anyqtalǵan. Olarǵa birneshe bap boiynsha ákimshilik hattamalar toltyrylǵan.
Sot sheshimimen quqyq buzýshylardyń biri 5 táýlikke ákimshilik qamaýǵa alynsa, ekinshisine aiyppul salyndy.
Politsiia agressivti júrgizýdiń árbir faktisi nazardan tys qalmaitynyn atap ótti. Mundai quqyq buzýshylyqtarǵa keshendi túrde quqyqtyq baǵa berilip, kináliler tolyq jaýapkershilikke tartylady.
Almaty qalasy PD ákimshilik politsiia basqarmasynyń bastyǵy Ábdinur Tasybaevtyń aitýynsha, joldaǵy drift pen agressivti júrgizý azamattardyń ómiri men densaýlyǵyna tikelei qaýip tóndiredi.
«Qoǵamdyq joldarda “sheberlik” kórsetý áreketteri mindetti túrde zań aldynda jaýap berýmen aiaqtalady. Bul baǵyttaǵy jumys júieli túrde jalǵasady», – dedi ol.
Politsiia júrgizýshilerdi jol qozǵalysy erejelerin qatań saqtaýǵa jáne joldaǵy qaýipsizdikke jaýapkershilikpen qaraýǵa shaqyrdy.
