Almatyda turǵyn úilerdiń birinde kisi qolynan qaza bolǵan Aiajan Edilovanyń nemere aǵasy jantúrshigerlik qylmystyń mán-jaiyn aityp berdi, dep habarlaidy Sputnik Qazaqstan.
"Bir táýlik ishinde ol (kúdikti – Sputnik) denesin muqiiat ári asyqpai bólshektegen. Al politsiia onyń aldymen Aiajandy óltirip, artynsha denesin bólshektegenin aityp otyr. Politsiia túsirgen fotony kórgende eseńgirep qaldyq... árbir tisin qaǵyp, árbir tyrnaǵyn kesip alǵan. Sonyń bári paket ishinde jatqanyn kórdik. Maniak onyń basyn kesip alyp, qainatqan. Bas súiegi ǵana qalǵan", - dedi qyzdyń aǵasy Almat Múlikov.
Onyń aitýynsha, qazir adamdy taný boiynsha saraptama júrgizilip jatyr. Máiittiń bólshekteri jinalyp jatyr. Er adamnyń boljaýynsha, ol jerde bir ǵana dene bolmaǵan, sol sebepti saraptama bes kúnge sozyldy.
"Saraptama nátijesin tezdetýin, Aiajannyń týystaryn shaqyryp, DNQ testin alýyn talap etemiz. Olar qazir Taldyqorǵanda, olardy eshkim shaqyrmady. Eshkim resmi túrde onyń Aiajan ekenin málimdegen joq. Barlyǵy tek sóz júzinde. Aiajannyń qaitys bolǵany týraly BAQ arqyly bilgenimiz de ras", - dedi marqumnyń aǵasy.
Sonymen qatar boijetkenniń týystary qaitys bolǵan qyzdyń Aiajan ekenine kúmánmen qarap otyr. Sebebi aiaq kiim, telefon, sómkesi sekildi kei zattary tabylǵan joq. Onyń Aiajan ekenine politsiia 100% senimdi bola almaidy, dep atap ótti Almat.
Qaza tapqan qyzdyń týystary onyń kúdiktimen arnaiy sait arqyly tanyspaǵanyna senimdi. Olar ony aldap shaqyrǵan dep sanaidy.
"Ol jeńil oilaityn qyz emes edi. Úsh aidan beri kezdesip júrgen jigiti bar. Sol jigit birinshi bolyp dabyl qaǵyp, izdeýge kiristi. Biz onyń kezdesýge jumys boiynsha barǵanyna senimdimiz, onyń tanysýǵa barýy múmkin emes. Kúdiktiniń farmatsevt mamandyǵyn alǵanyn bilemiz, munda páter jaldap turǵan. Ony politsiia ustaǵan kezde kórdik. Sol ýaqytta ol ózine jaraqat salyp úlgerdi. Ony ustaǵan kezde politsiiany kelemejdegeni týraly da aqparat bar", - dedi marqumnyń týystary.
Olar politsiia qyzdyń iz-túzsiz joǵalǵany týraly aryzdy birden qabyldamaǵanyn aityp shaǵymdandy. Týystary kúdiktiniń mekenjaiyn ózderi tapqanyn aityp otyr. Sol jerge barǵanda úidiń janynda politsiia qyzmetkerleri de bolǵan.
Al politsiia muny negizsiz aitylǵan pikir dep málimdedi.
"Biz tergeýdi ótinish túsken kezde bastadyq. Eshteńe kútpei, birden jedel top qurdyq", - dedi brifingte Almaty politsiia departamenti basshysynyń orynbasary Rústem Ábdirahmanov.
Sonymen qatar Aiajannyń týystary qylmys jasalǵan kúnnen beri 5 kún ótkenin, al ózderi ony jerlei almai otyrǵanyn aitty.
"Ol Taldyqorǵannyń qyzy. Ata-anasy sol jaqta. Biz jerleý úshin denesin, onyń bólshekterin berýin kútip otyrmyz", - dedi Almat Múlikov.
Aita keteiik, buǵan deiin Almaty politsiia departamenti kúdiktiniń Túrkistan oblysynyń 1993 jyly týǵan turǵyny ekenin habarlady. Politsiia kisi óltirýdiń sebebi men ádisin anyqtaý úshin tergeý júrgizýde.
Kúdikti jábirlenýshimen jynystyq qatynasqa túsken-túspegeni, psihikalyq aýytqýy jáne qylmysta kannibalizm belgileri bar-joǵyn saraptama men tergeý kórsetedi.
Qylmystyq kodekstiń 99-babynyń ekinshi bóligi "Adam óltirý" boiynsha qylmystyq is qozǵaldy. Osy bap boiynsha 15 jyldan 20 jylǵa deiin nemese ómir boiyna bas bostandyǵynan aiyrý jazasy kózdelgen.
22 naýryzda qyzdyń joǵalǵany týraly habarlandyrý áleýmettik jelilerde paida boldy. Týystarynyń aitýynsha, 2001 jyly týǵan Aiajan Edilova 19 naýryz kúni saǵat 20:43-te jumystan shyǵyp ketken jáne úige oralmaǵan. Baqylaý kamerasy qyzdy sońǵy ret jumystan shyqqan kezde túsirgen. Sol kúni qyzdyń denesi tabylǵany habarlandy.
