Almatyda 20-21 maýsym kúnderi qoǵamdyq kólik marshrýtqa shyqpaidy. Bul týraly búgin qala ákimi Baqytjan Saǵyntaev QR Premer-Ministri tóraǵalyǵymen QR aýmaǵynda koronavirýs infektsiiasynyń taralýyna jol bermeý jónindegi vedomstvoaralyq komissiianyń (VAK) selektorlyq otyrysynan soń aitty, dep habarlaidy "Ult aqparat".
«Qaýipti indettiń ýshyǵa túsýine bailanysty Úkimet epidjaǵdaidy turaqtandyrý boiynsha jańa sharalardy qolǵa aldy. Osy oraida Almatyda da karantin rejimin kúsheitý boiynsha qosymsha sharalar qabyldandy.
Senbi-jeksenbi, iaǵni 20-21 maýsym kúnderi qoǵamdyq kóliktiń qyzmeti toqtatylady. Osyǵan bailanysty qala turǵyndaryn bul jumystarǵa túsinistikpen qaraýǵa shaqyramyn. Karantin sharalaryn bosańsytý – COVID-19-dyń órshýine ákep soqty. Qala turǵyndarynan kóshede júrýin shektetýin suraimyz. Ásirese qart adamdardyń úide otyrǵany abzal», - dedi qala ákimi.
Odan bólek demalys kúnderi saiabaqtar, skverler men jaiaý júrginshiler aimaǵy, ózender men sý qoimalarynyń jaǵalaýlary, taý shańǵysy kýrorttary jáne basqa da qoǵamdyq oryndar, iri saýda jáne qyzmet kórsetý nysandary jabylady.
Qosymsha aqparattardy 1308 nómirindegi call-ortalyqtan bilýge bolady.
Buǵan deiin QR Premer-Ministri Asqar Maminniń tóraǵalyǵymen QR aýmaǵynda koronavirýs infektsiiasynyń taralýyna jol bermeý jónindegi vedomstvoaralyq komissiianyń (VAK) selektorlyq otyrysy ótkenin jazǵan edik. Onda QR Prezidenti Qasym-Jomart Toqaevtyń tapsyrmasyna sáikes Qazaqstandaǵy epidemiologiialyq jaǵdaidy turaqtandyrý boiynsha qosymsha sharalar qaraldy.
