.webp)
Sýret: QR Saýda jáne integratsiia ministrligi
Atakent-Ekspo kórme ortalyǵynda qoldan toqylǵan kilemder, jemister men kókónister, jańǵaqtar, shafran shaiy, antikvariat, qurylys materialdary, asyl tastar, konditerlik ónimder siiaqty dástúrli aýǵan ónimderi tanystyryldy, dep habarlaidy Ult.kz.
Bul is-shara Qazaqstanda ótkizilgen aýǵan ónimderiniń ekinshi kórmesi bolyp tabylady. Ony Saýda jáne integratsiia ministrligi men Qaztrade saýda saiasatyn damytý ortalyǵynyń qoldaýymen uiymdastyrdy.
Ashylý saltanatyna vitse-premer Serik Jumanǵarin jáne Aýǵanstannyń saýda jáne ónerkásip ministri Nýriddin Azizi qatysty.
2023 jyly Astanada ótken kórmemen salystyrǵanda, Almatydaǵy kórmeniń aýqymy eki ese keńeigen. Atakent-Ekspo kesheniniń 1024 sharshy metrlik alańynda 80-nen astam aýǵan kompaniialary men 150-den astam biznes ókilderi óz taýarlaryn usyndy. Sondai-aq kórmege aýǵandyq The First Microfinance Bank, Islamic Bank of Afghanistan, Ghazanfar Bank ókilderi qatysty.
"Qazaqstan Aýǵanstandy Ońtústik jáne Ortalyq Aziiadaǵy mańyzdy seriktes retinde qarastyrady. Eki el arasyndaǵy saýda bailanystary ǵalamdyq daǵdarystarǵa qaramastan turaqty damýda. Qazaqstan tek óz ónimin aýǵan naryǵyna shyǵaryp qana qoimai, aýǵan taýarlarynyń qazaqstandyq naryqqa enýine de jaǵdai jasap keledi", - dep atap ótti vitse-premer Serik Jumanǵarin.
Sýret: QR Saýda jáne integratsiia ministrligi
«Haidar Rafat LTD» kompaniiasynyń iesi Abdýl Basir Qazaqstanǵa alǵash ret kelip, kórmege ulttyq áshekei buiymdary men antikvariat kollektsiiasyn ákelgenin aitty. Onyń sózinshe, eń kóne eksponattardyń biri antikvariattyń halyqaralyq sertifikatyna ie bolǵan.
Sonymen qatar, Fereba Naseri, Aýǵanstan Isker áielder qaýymdastyǵynyń basshysy, tabiǵi shikizattan jasalǵan qolóner buiymdaryn tanystyrdy. Almatydaǵy kórmege 12 sheber áiel qatysyp, olardyń jumystary halyqaralyq deńgeide, Germaniia, Frantsiia jáne Amerikada úlken suranysqa ie ekenin aitty. Fereba Naseri jergilikti kásipker áieldermen bailanys ornatyp, odan ári yntymaqtastyqty damytýdy josparlap otyr.
Almatydaǵy dástúrli aýǵan ónimderiniń kórmesi 2024 jyldyń 20-22 qazan aralyǵynda ótedi. 22 qazanda qazaqstan-aýǵan biznes-forýmy uiymdastyrylyp, onda B2B kezdesýler arqyly jańa seriktestik múmkindikteri talqylanatyn bolady.
