Almatylyq dárigerler alty jasar balanyń asqazanynan 100 teńgelik tiyndy alyp tastap, jerjańǵaqqa qaqalyp qalǵan eki jasar balanyń ómirin saqtap qaldy, dep habarlaidy QazAqparat.
Balalarǵa arnalǵan meditsinalyq járdem ortalyǵynyń habarlaýynsha, meditsinalyq mekemege alty jastaǵy balanyń anasy kelip, ulynyń tiyn jutyp qoiǵanyn aityp kómek surǵan.
«Shuǵyl túrde balanyń asqazany rentgenge túsirildi. Rentgen kishkentai balanyń asqazanynda bóten zat, iaǵni 100 teńgelik tiyn bar ekenin kórsetti. Dárigerler operatsiiasyz endoskopiialyq jolmen asqazannan bóten zatty shyǵardy. Ota sátti ótti. Búgin bala aýrýhanadan shyǵaryldy»- - dedi jedel járdem bóliminiń bastyǵy Meiirjan Qurmanaliev.
Osy tektes oqiǵa kelesi kúni de qaitalandy.
«Bizdiń aýrýhanaǵa eki jasar bala keshki ýaqytta tústi. Anasynyń aitýynsha, balasy jerjańǵaq qosylǵan shokolad jep otyryp qaqalyp qalǵan. Búldirshiniń túni boiy mazasy ketip, ystyǵy kóterilip, tynysy tarylǵan. Nátijesinde anasy men balasy jedel járdemmen bizdiń aýrýhanaǵa jetkizildi. Balaǵa keýde qýysynyń rentgenografiiasy, ókpeniń kompiýterlik tomografiiasy, bronhoskopiia jasaldy. Osydan keiin «tynys alý joldarynda bóten zat tur» degen diagnoz qoiyldy. Tekserý barysynda sol jaq ókpeniń dem almaityny anyqtaldy, bul ókpeniń abstsessine ákelý qaýipin tóndirdi », - dedi dáriger.
Dárigerler joǵaryda atalǵan ádisti qoldana otyryp, kishkentai naýqasqa ýaqtyly kómek kórsetti. Qazir sábidiń jaǵdaiy jaqsy. Ony aýrýhanadan shyǵarýǵa daiyndap jatyr.
Jalpy, jyl basynan beri shuǵyl kómek kórsetý ortalyǵyna ártúrli zattardy jutyp qoiǵan 120-ǵa jýyq bala júgingen.
