Almatynyń Áýezov aýdanynda alǵash ret tamaq qaldyqtaryn jinap, keiin qaita óńdeýge arnalǵan konteinerler ornatyldy, - dep habarlaidy Tengrinews.kz agenttigi.
Almatyda kásipkerlerdiń bastamasymen buzylǵan nan, eskirgen toqash, merzimi ótip ketken makaron jáne basqa da nan ónimderin jinaityn sary jáshikter ornatyldy. Jinalǵan tamaq qaldyqtary mal azyǵyna óńdeledi.
"Alǵashynda mundai konteinerler birneshe ýchaskege ornatyldy, bizge QSK jáne qoqys shyǵaratyn kompaniialar habarlasty. Biz kásipkerlerdi shaqyrdyq olar mán-jaidy túsindirdi, aýdan ákimdiginiń basshylyǵy olardyń ideiasyn qoldady. Bul másele turǵyndar úshin de ózekti bolǵan. Sebebi osyǵan deiin kóptegen taza, adal tamaq qaldyqtaryn konteinerge tastamai, it, qus jáne mysyqtardy tamaqtandyrý úshin jaqyn jerge qaldyrǵan. Bul basqa turǵyndar úshin óte yńǵaisyz ekeni belgili. Konteinerler ornatylǵannan keiin aýlalarda qańǵybas janýarlar azaiyp, qoqys jáshikteriniń ainalasy áldeqaida tazaryp qaldy", - deidi Áýezov aýdany ákimdiginiń abattandyrý basqarmasynyń basshysy Aidyn Tursynov.
Ákimdiktiń málimetinshe, qazirdiń ózinde oblys boiynsha nan ónimderin jinaýǵa arnalǵan 180 konteiner ornatylǵan. Olardyń keibireýleri buzaqylardyń shabýylyna ushyrap, 78 konteinerdi jóndeýge jiberýge týra keldi.
Aǵasymen birge konteiner ornatýdy qolǵa alǵan kásipker Baǵdat Sárseev óz tájiribelerin qalanyń basqa da aýdandaryna jetkizip, azyq-túlik qaldyqtaryn jinaityn jalpy sany 1500-ge jýyq konteiner ornatýdy josparlap otyrǵandaryn jetkizdi.
"Bul ideia karantinge deiin qoǵamdyq tamaqtandyrý salasynda jumys istegen aǵamyzǵa tiesili. Pandemiia kezinde biznes toqtap qaldy, sodan keiin nan ónimderin jinap, óńdeý ideiasy keldi. Ol adamdardyń nandy qoqys jáshikterine tastamaitynyn baiqaǵan. Meniń oiymsha, mundai konteinerlerdi ornatý qajet. Ekologiialyq turǵydan alǵanda, úlken máseleni sheshedi. Osyǵan deiin azyq-túlik qaldyqtary qaita óńdelmei kádimgi shuńqyrlarǵa tógilip kelgen. Qazir biz osyndai konteinerlerdi ornatqan jerlerdegi qoqys kólemi aitarlyqtai azaidy", - dedi Baǵdat Sárseev.
Kásipkerdiń aitýynsha, olar astyq qaldyqtaryn, makaron ónimderin, jarma ónimderin qabyldaidy. Konteinerler úsh kún saiyn tazalanady jáne osy ýaqyt ishinde olarda 600 kelige deiin qaldyq jinalýy múmkin.
"Qazirgi ýaqytta kelip túsetin nandy qolmen suryptaimyz. Polietilen paketterin alyp tastaimyz. Sodan keiin nandy keptirip, usaqtap, daiyn jemge túiirshikteimiz. Termiialyq óńdeýden keiin túiirshikterdi usaq jáne iri qara malǵa berýge bolady. Biz jemdi tek dostarymyzǵa satamyz, tipti olardyń ózine jetpei qalady. Bizdiń baǵamyz naryqtaǵydan sál tómen", - dep qosty kásipker.
Baǵdat Sárseev alǵashynda konteinerlerdiń esigin buzyp, ainalasyna nan laqtyratyn vandaldardan qatty zardap shekkenderin aitty.
