Zań buzýshylyqty Almaty qalasynyń Din isteri jónindegi basqarmasy monitoring júrgizý barysynda anyqtady. Osyǵan bailanysty 2026 jylǵy 24 shildede azamatqa qatysty Qazaqstan Respýblikasynyń Ákimshilik quqyq buzýshylyq týraly kodeksiniń 490-baby 1-tarmaǵynyń 3) tarmaqshasy boiynsha ákimshilik quqyq buzýshylyq týraly hattama toltyryldy. Bul týraly Almaty qalasy Din isteri jónindegi basqarmasy málimdedi, dep habarlaidy ult.kz.
Ákimshilik is júrgizý barysynda azamat óz kinásin tolyq moiyndady. Nátijesinde is qysqartylǵan tártippen qaralyp, oǵan ákimshilik aiyppul salyndy.
Aita ketý kerek, buǵan deiin atalǵan bloger sán kórsetilimi kezinde podiýmǵa shyqqan qyz balalar týraly jariialaǵan beineúndeýinen keiin qoǵam nazaryn aýdarǵan bolatyn. Ol balalardyń mundai is-sharalarǵa qatysýyn dini turǵydan synǵa alǵan. Atalǵan jariialanym qoǵamda túrli pikirtalas týǵyzdy.
Almaty qalasynyń Din isteri jónindegi basqarmasy azamattardy dini qyzmet salasyndaǵy zańnama talaptaryn saqtaýǵa shaqyrady.
«Dini qyzmet jáne dini birlestikter týraly» Qazaqstan Respýblikasy Zańynyń 9-babyna sáikes dini ádebietterdi jáne dini mazmundaǵy ózge de materialdardy taratýǵa tek zańnamada belgilengen oryndarda ǵana jol beriledi. Atap aitqanda, mundai materialdardy ǵibadat úilerinde (ǵimarattarynda), dini bilim berý uiymdarynda, sondai-aq ornalasqan jerlerin jergilikti atqarýshy organdar aiqyndaityn arnaiy statsionarlyq úi-jailarda taratýǵa bolady.
Zań talaptaryn buzý Qazaqstan Respýblikasynyń zańnamasynda kózdelgen ákimshilik jaýapkershilikke ákep soǵady.
