Almatynyń Medeý aýdanynda bir jylda 1160 orynǵa arnalǵan eki mektep paidalanýǵa berildi. Bul týraly óńirlik kommýnikatsiialar qyzmetiniń alańynda ótken brifing barysynda Medeý aýdanynyń ákimi Áset Masabaev aitty, dep habarlaidy QazAqparat.
Almaty qalasy ákimi Baqytjan Saǵyntaevtyń tapsyrmasymen megapoliste pandemiiaǵa qaramastan, mektepter men balabaqshalardaǵy oryn tapshylyǵyn azaitý boiynsha keshendi jumystar jalǵasyp jatyr.
2020 jyly 2 mektep salyndy, 2021 jyly 8 mektep jáne 17 qosymsha qurylys salynady. Sonyń arqasynda 23 myń oqýshy orny qurylady jáne 2021 jyly oqýshy oryndarynyń tapshylyǵy 73% - ǵa qysqarady.
Medeý aýdanynda barlyǵy 43 jalpy bilim beretin mektep bar. Jalpy kontingenti 31 353 bolatyn 28 memlekettik mektep (29 360 oryn) jáne 15 jekemenshik mektep (1 993 oryn) bar.
«2020 jyly qyrkúiek aiynda «Dýman» shaǵynaýdanynda 850 oryndyq jańa mektep boi kóterdi. Sondai-aq, ótken jyly jeke investorlar esebinen kelesi mektepter salynyp, paidalanýǵa berildi: «Ýálihanov atyndaǵy mektep», «Steam», «Úrker», «Poznai-ka mektebi (AMS)», «Ǵanibet». Olardyń jalpy jobalyq qýattylyǵy 1160 orynǵa arnalǵan jáne 143 turaqty jumys orny quryldy», - dedi Á.Masabaev.
Sonymen qatar, ol 2021 jyly Ormanov kóshesi (Shyǵys ainalma joly) mekenjaiy boiynsha jeke investitsiialar esebinen 540 oryndyq zamanaýi mektep ashylatynyn atap ótti.
«Alataý» shaǵynaýdanynda ornalasqan №7 mektep ǵimaratyna seismikalyq kúsheitý arqyly kúrdeli jóndeý júrgizilýde. Aiaqtalý merzimi 2021 jyldyń shildesi. Sonymen birge, №48 mektep ǵimaratyna qosalqy qurylys arqyly kúrdeli jóndeýge jobalyq-smetalyq qujattar ázirlenýde. Jobany iske asyrý merzimi – 2021 jyl»,- dedi ol.
Sondai-aq spiker Medeý aýdanyndaǵy mektepke deiingi bilim berý uiymdaryna da toqtalyp ótti.
Aýdanda 18 bóbekjai jáne 49 jeke menshik balabaqsha jáne 37 shaǵyn ortalyq bar. Jalpy 5 100 búldirshin bar (memlekettik balabaqshalarda - 2935, jekemenshik balabaqshalarda - 2165.)
«№ 114, 116, 141 úsh balabaqshada ǵimaratqa japsarlas jáne qosymsha qurylys esebinen árbir balabaqshada jobalyq qýattylyqty 50 orynǵa ulǵaita otyryp, kúrdeli jóndeý boiynsha jumys jalǵasýda. Aiaqtalý merzimi-2021 jyldyń naýryz aiy.2020 jyldyń basynan beri aýdanda jeke investorlar esebinen jalpy jobalyq qýaty 250 oryndyq 5 jekemenshik balabaqsha ashyldy. Biyl 5 jekemenshik balabaqsha men shaǵyn ortalyqtar ashý josparlanyp otyr»- dedi spiker.
Sonymen birge, aǵymdaǵy jyly birqatar áleýmettik-mádeni nysandardy ashý josparlanýda:
- Jekemenshik balabaqshalar jáne shaǵyn ortalyqtar; S.Nurmaǵambetov kóshesi, 150 mekenjaiy boiynsha High Tech Academy jekemenshik mektebi
- Ál-Farabi dańǵyly, 30/5 ýchaskesinde jekemenshik «Balet teatrty»;
- Alataý sh/a «Shyńǵa Órleý» áleýmettik jobasy;
- Dýman sh/a ashyq aýadaǵy fitnes klýb.
