Qala basshysy Qazaqstan Prezidenti Qasym-Jomart Toqaevtyń atynan Almatynyń 31 turǵynyna memlekettik nagradalardy tapsyrdy, dep habarlaidy "Ult aqparat" ákimdiktiń resmi saityna silteme jasap.
Olardyń qatarynda eldiń áleýmettik-ekonomikalyq jáne mádeni damýyna eleýli úles qosqan, qalanyń qoǵamdyq ómirine belsendi qatysqan, qańtardaǵy oqiǵalar kezinde azamattardy qutqarý jáne qorǵaý barysynda batyldyq tanytqan azamattar bar.
«Parasat» ordenimen QR Ulttyq Ǵylym akademiiasynyń akademigi Kárimbek Qurmanaliev, «Qazaqstan Respýblikasynyń Qyzyl Jarty Ai qoǵamy» QB prezidenti Erkebek Arǵymbaev, «Qurmet» ordenimen Qazaqstan Jazýshylar Odaǵy tóraǵasynyń orynbasary Aqberen Elgezek, «Shapaǵat» medalimen «Lider.kz» Eriktiler qozǵalysy» QB basshysy Dilmira Blats, turǵyn úidegi órtti sóndirýshi, aýla qyzmetkeri Arlan Mýtishev jáne taǵy basqalary marapattaldy.
Óziniń sózinde qala ákimi Erbolat Dosaev Memleket basshysynyń sheshimi boiynsha memlekettik nagradalarmen marapattaý rásimi alǵash ret kóktemgi jańarý kúni qarsańynda ótip otyrǵanyn atap ótti.
«Dál osy Naýryz merekesi qarsańynda Prezident Qasym-Jomart Kemeluly Toqaev «Jańa Qazaqstandy» qurý jolyndaǵy saiasi jańarý men jańǵyrtýdyń strategiialyq paiymyn baiandaityn Joldaýyn jariia etti. Memleket basshysy eldiń turaqty ilgerileýi men aýqymdy áleýmettik-ekonomikalyq ózgerister saiasi jańǵyrýsyz múmkin emes ekenin atap ótti», – dedi Almaty ákimi.
Kezdesý sońynda qala basshysy saltanatty rásimge qatysýshylardy laiyqty memlekettik nagradalarmen quttyqtap, jumysta tabys jáne jańa biikterge jetýlerine tilektestik bildirdi.
