Almatyda kolledj stýdentteriniń tóbelesi videoǵa túsip qaldy. Politsiia qyzmetkerleri jappai tóbelesti toqtatty, - dep habarlaidy "Ult aqparat" Polisia.kz-ke silteme jasap.
22 qazanda 102 nómirine Baitursynov pen Jambyl kósheleriniń qiylysynda bir top jastyń arasyndaǵy tóbeles týraly habarlama kelip tústi.
"Dabylǵa birinshi bolyp patrýl politsiia ekipajdary jetti. Olar tóbelesti toqtatty. Eki kolledjdiń stýdentteri arasynda janjal týyndaǵany anyqtaldy. Onyń shyǵý sebebi naqtylanyp jatyr. Zardap shekkender joq. Osy derek boiynsha QR Qylmystyq kodekstiń 293-baby 2-bóligi (Buzaqylyq) boiynsha qylmystyq is tirkeldi. Tóbeleske qatysýshynyń árqaisysynyń is-áreketine QR zańnamasyna sáikes sharalar qabyldana otyryp, quqyqtyq baǵa beriledi", - dedi Almaly aýdandyq Politsiia basqarmasynyń basshysy Esen Ysqaqov.
