Almatyda bir táýlik ishinde jol qozǵalysy erejelerin buzýdyń 1 959 deregi anyqtaldy. Onyń ishinde jol qozǵalysyna qatysýshylardyń ómiri men densaýlyǵyna joǵary qaýip tóndiretin 191 óreskel quqyq buzýshylyq tirkelgen, dep habarlaidy ult.kz.
Almaty qalasynyń prokýratýrasy málimetinshe, anyqtalǵan quqyq buzýshylyqtardyń arasynda kólikti mas kúiinde basqarý, qaýipti manevr jasaý, qarsy qozǵalys jolaǵyna shyǵý jáne kólik júrgizý kezinde telefon paidalaný faktileri bar.
Atap aitqanda, 8 júrgizýshi kólikti mas kúiinde basqarǵan. Taǵy 2 adam kólik júrgizý quqyǵynan aiyrylǵanyna qaramastan, rólge otyrǵan.
Sondai-aq manevr jasaý qaǵidalaryn buzýdyń, onyń ishinde qaýipti manevr jasaýdyń («shashka») 71 deregi anyqtaldy. 67 júrgizýshi qaýipsizdik beldigin taqpaǵan.
Budan bólek, qarsy qozǵalys jolaǵyna shyǵýdyń 7 deregi jáne kólik quralyn basqarý kezinde uialy telefon paidalanýdyń 36 deregi tirkeldi.
Quqyq buzýshylyqtar boiynsha 50 kólik quraly mamandandyrylǵan aiyp turaǵyna qoiyldy.
Almaty qalasynyń prokýratýrasy jol qozǵalysy erejelerin saqtaý joldaǵy qaýipsizdikti qamtamasyz etýdiń negizgi sharttarynyń biri ekenin eskertti.
