Almatyda Sotsialistik Eńbek Eri, KSRO Halyq ártisi, KSRO Memlekettik syilyǵynyń laýreaty Bibigúl Tólegenovanyń mereitoiy saltanatty túrde atap ótildi, dep habarlaidy QazAqparat.
Abai atyndaǵy memlekettik akademiialyq opera jáne balet teatryna Bibigúl Tólegenovanyń týystary, saiasi jáne qoǵam qairatkerleri, sondai-aq mádeniet pen óner ókilderi jinaldy.
Qazaqtyń bulbuly atanǵan Bibigúl Tólegenovany Almaty qalasynyń ákimi Baqytjan Saǵyntaev qutyqtady.
«Búgin — barshamyz úshin erekshe kún. Sebebi ómiri ónerge, óneri ómirge ainalǵan aiaýly Bibigúl apaiymyz qýanyshyn bizben bólisip otyr. Qazaqtyń kásibi án óneri degende bizdiń oiymyzǵa birden Kúlásh Baiseitova, Roza Baǵlanova, Ermek Serkebaev jáne búgingi toi iesi Bibigúl Tólegenova oralady. Tabiǵi talanty men tynymsyz eńbeginiń arqasynda ónerdiń shyńyna shyqqan, halqynyń shynaiy mahabbatyna bólengen Bibigúl apamyzdy osydan 10 jyl buryn Pavlodar oblysynyń ákimi bolyp otyrǵan kezimde quttyqtap, batasyn alyp edim. Búgin arý Almatynyń sol kisige degen ystyq yqylasyn jetkizý baqyty taǵy da maǵan buiyryp otyr. Men úshin bul erekshe qýanyshty sát. Búgingi toi tutastai qazaq óneriniń merekesi. Toi barshańyzǵa qutty bolsyn!» - dedi Baqytjan Saǵyntaev.
Bibigúl Tólegenovanyń 90 jyldyǵyna arnalǵan shyǵarmashylyq keshke QR Mádeniet jáne sport ministri Aqtoty Raiymqulova da qatysyp, júrekjardy quttyqtaýyn jetkizdi.
«Osydan týra 19 kún buryn elimizdiń ordasy, Nur-Sultan qalasynda tamasha kesh berdińiz. Mádeniet jáne sport ministrligi uiymdastyrǵan «Astana Opera» teatrynda ótken merekelik sharada qazaqstandyq tanymal opera ánshileri, izbasarlaryńyz, Bibigúl Tólegenova baiqaýynyń laýreattary án shyrqap, mereiińizdi tasytty. Árdaiym osylai abyroi biiginde bolyńyz, Siz asqar shyńǵa shyǵýdyń, shyqqan soń sol biikte máńgilikke qalýdyń ozyq úlgisin kórsetken birtýar talant iesisiz! Siz taǵdyr talaiyńyzda san túrli qiyndyqty kórgen, qandai sátsizdikti bolsyn parasattylyqpen, aqylmen eńsere bilgen kemeńger ańyz adamsyz. Endi sol beinetińizdiń zeinetin kórip, ortamyzda jón silter, baǵdar berer aqylmanymyz bolyp aman júrińiz»,- dedi Aqtoty Raiymqulova.
