Almatyda kafelerdiń birine belgisiz bireýler qorǵanysqa arnalǵan gaz ballonymen shabýyl jasady. Buzaqylardy politsiia ustap áketti, dep habarlaidy "Ult aqparat".
Bul týraly aqparat Instagram-da paida boldy. Oqiǵa Abai dańǵyly men Dostyq kóshesiniń qiylysynda ornalasqan kafede bolǵan.
«Biz jattyǵýdan keiin balalarmen birge dámhanaǵa kirdik. Arada 20 minýt ótken soń kafege qolynda pyshaǵy bar mas er adam júgirip kirip, aiǵailai bastady. Kafe qyzmetkerleri ony sabyrǵa shaqyrdy. Keiin onyń artynan taǵy 5-6 adamnyń qýyp kele jatqanyn kórgen qyzmetkerler kafeniń esigin ishinen kiltep aldy. Al buzaqylar esiktiń arǵy jaǵynan «gaz qutysyn» qoldandy. Ishindegi adamdar jótele bastady. Meniń balalarym ózderin jáisiz sizine bastady»,– dep jazdy avtor.
Qalalyq Politsiia departamentiniń baspasóz qyzmeti bul fakt qazirgi ýaqytta óndiriste ekenin málim etti.
«102» nómirine qońyraý túse salysymen politsiia ekipajy birden oqiǵa ornyna attandy. Buzaqylar ustaldy. Olarǵa qatysty Ákimshilik kodekstiń 434-baby (usaq buzaqylyq) boiynsha ákimshilik material toltyryldy. Sheshim qabyldaý úshin óndiristik materialdar sotqa jiberiledi», - dedi Medeý aýdandyq politsiia basqarmasynyń bastyǵy Dáýren Ótebaev.
