Qarjy naryǵyn retteý jáne damytý agenttigi (QNRDA), Almaty ákimdigi, bank ombýdsmeni, bankter jáne qoǵamdyq birlestikter arasynda ipotekalyq qaryzdar boiynsha jalǵyz turǵyn úidi satýdy jáne odan halyqtyń áleýmettik osal toptaryn shyǵarýdy toqtata turatyn ózara túsinistik pen yntymaqtastyq týraly memorandýmǵa qol qoiyldy, - dep habarlaidy Tengrinews.kz tilshisi agenttikke silteme jasap.
Memorandýmdy ázirleý 2020 jyldyń maýsymynda bastalǵany atap ótildi.
"Memorandýmnyń maqsaty taraptardyń problemalyq bereshekti, onyń ishinde ipotekalyq turǵyn úi qaryzdaryn/ipotekalyq qaryzdardy qaita qarjylandyrý baǵdarlamasynyń sharttary boiynsha qaita qarjylandyrylǵan bereshekti retteý jóninde sharalar qabyldaýy arqyly HÁOT-qa jatatyn qaryz alýshylardyń (teń qaryz alýshylardyń, kepilgerlerdiń, kepil berýshilerdiń) quqyqtaryn qorǵaý", - delingen QNRDA habarlamasynda.
Memorandýmǵa sáikes, qiyndyqtary bar qaryzdy retteý kezeńinde bankter mynany toqtata turady: sot isin júrgizý, qaryzdy óndirip alý úshin atqarýshylyq jazbany jasaýǵa notariýsqa júginý, bank balansyna qabyldanǵan jalǵyz turǵyn úidi satý, qaryz alýshylardy turǵyn úiden shyǵarý, onyń ishinde banktiń balansyndaǵy osy turǵyn úidiń burynǵy ielerin shyǵarý.
Aita keteiik, bul mindetti memorandým emes.
"Taraptardyń árqaisy memorandýmnyń izgi niet aktisi ekenin rastaidy jáne taraptardyń belgilengen maqsattarǵa qol jetkizý úshin adal yntymaqtasýǵa degen ózara nietin bildiredi jáne azamattyq quqyqtar men mindetterdi belgileitin shart nemese ózge qujat retinde túsindirilmeidi", - delingen qujatta.
Memorandým kúshine endi, ol qol qoiylǵan kúnnen bastap 12 ai qoldanysta bolady.
Buǵan deiin Almatyda bolǵan atystan soń qaryz alýshylardy úiinen shyǵarý máselesi belsendi talqylana bastaǵan bolatyn. Eske salaiyq, 20 qyrkúiekte Almatynyń Aqbulaq shaǵynaýdanynda er azamat bes adamdy atyp óltirdi, olardyń arasynda politseiler, sot oryndaýshysy jáne qarapaiym turǵyndar bar. Ol úiden shyǵarý týraly sot sheshimin oryndaýǵa kelgen adamdarǵa oq atqan.
