Almatydaǵy búlik kezinde kólikte bala emizip otyrǵan áieldiń basyna oq tiip, kóz jumdy. Bul týraly óziniń áleýmettik jelidegi paraqshasynda jýrnalist Gúlmira Ábiqai jazdy, dep habarlaidy Sputnik Qazaqstan.
Onyń aitýynsha, balalar ombýdsmeni bul oqiǵadan habarsyz.
"Búrkitbaevtar bir-aq kúnde qara jamyldy. 5 qańtarda qyzýy kóterilip, mazasyzdanǵan 7 ailyq Nurymǵa dári alýǵa shyqqan otbasy anadan aiyryldy. 35 jastaǵy Janar kishkentaiyn emizgen kúii basyna oq tiip mert boldy. Azan-qazan jylaǵan bala, qanǵa bókken bópe, eseńgiregen otaǵasy", - dep jazdy ol.
Jýrnalistiń sózinshe, esi shyǵyp ketken otaǵasy sol kúii qaladaǵy qaiyn ápkesine barady. Olar túsinbei, abdyrap , birinshi kezekte jedel járdem shaqyrǵan, biraq ol kelmedi.
"Jaryn ózdiginen 4-shi aýrýhanaǵa aparǵanda, dárigerler oq basyn tesip, mi ishinde qalǵanyn, azamatsha sol mezette-aq júrip ketkenin aitqan", - deidi ol.
Marqum áiel Jambyl oblysyna aparyp jerlengen.
"Bul ólimnen resmi bilik, balalar ombýdsmeni habarsyz. Otbasyna kóńil aityp kelgen eshkim joq. Keshe otaǵasynyń shaqyrýymen úilerine men bardym. 4 balanyń úlkeni 7-de, 4-te, 2-de, kishisi endi eńbektep júr. Qala shetindegi jaldamaly vremianka. Sultan qujatpen júgirip júr, Nurym emshekten shyǵyp, eshkiniń sútine kóshýde, qyz baqshadan qaldy, erteń mektep… jaǵdai qiyn", - dep jazdy jýrnalist.
Aitýynsha, otbasy osy aidyń balalarǵa arnalǵan 76 myń teńge járdemaqysyn da ala almady.
Jýrnalist halyq bolyp otbasyǵa materialdyq kómek kórsetýge úndedi.
