Almaty qalalyq politsiia basqarmasynyń jedel izdestirý bólimshesiniń qyzmetkerleri balalardy jappai urlaý týraly aqparat tartqan adamdy anyqtap, ustady, dep habarlaidy QazAqparat tilshisi.
«Ol almatylyq 1991 jyly týǵan áiel bolyp shyqty. Áiel óziniń shynymen qoǵamda negizsiz dúrbeleń men úrei týǵyzǵan aýdio habarlamanyń avtory ekenin moiyndady. Ol bul rastalmaǵan aqparatty qurbysy aitty dep túsindirdi. Qazirgi ýaqytta onyń áreketteri QRQK 274-baby 2-bóligi boiynsha PD tergeý basqarmasynda aqparattyq-kommýnikatsiialyq júieler arqyly jalǵan aqparat taratty degen aiyp taǵylyp otyr. Sotqa deiingi tergeý bastaldy», - dedi Almaty qalalyq PD kriminaldyq politsiiabasqarmasynyń bastyǵy Janbolat Ziadin.
Ustalǵan áiel óz kezeginde, ókinishin bildirip, almatylyqtardan keshirim surady.
«Meniń daýsymmen taraǵan habarlama kópshilik arasynda úrei týdyrdy. Men Almaty qalasynyń turǵyndarynan keshirim suraimyn. Shynymdy aitsam, bul áleýmettik jelilerde tarap, búkil qalada qorqynysh týǵyzady dep kútken joqpyn. Ótinip suraimyn keshirińizdershi», - dedi ol.
«Shyndyǵynda, áleýmettik jeli halyqtyń obektivti jáne senimdi aqparat alýyna múmkindik beretin alań bolýy kerek. Ókinishke qarai, keibir adamdar áleýmettik jelilerdi ózderiniń qylmystyq maqsattaryna jetý úshin ǵana qoldanady. Al internet paidalanýshylar shyndyq pen ótirikti ajyrata almai qalady. Onyń rastyǵyna kóz jetkizbesten ózderiniń tanystaryna jiberedi. Mine sodan keiin halyq arasynda úrei týyndaidy. Tolqý bastalady. Mundai áreketke barǵandar zań aldynda jaýap beredi. QRQK 274-babyna sáikes qylmystyq jaýaptylyq qarastyrylatyndyǵyn taǵy da eske salamyn», - dep qorytyndylady Janbolat Ziadin.
Esterińizge sala keteiik, keshe Almaty qalalyq politsiia departamenti qala men Almaty oblysynda balalardy jappai urlaý týraly habarlamany joqqa shyǵarǵan bolatyn.
