Búgin «EYDU-nyń Eýraziia aptalyǵy – 2017» forýmy aiasynda QR Premer-Ministri Baqytjan Saǵyntaevtyń EYDU bas hatshysy Anhel Gýrriamen jáne forýmǵa qatysýshy elder delegatsiialarynyń basshylarymen kezdesýi ótti, dep habarlaidy "Ult aqparat".
Kezdesý barysynda 2015 jyldan bastap Qazaqstan men EYDU-nyń tájiribemen almasýdyń sapaly jańa platformasy — Yntymaqtastyqtyń qol qoiylǵan eldik baǵdarlamasy aiasynda belsendi ózara is-qimyl jasasý kezeńine ótkeni atalyp ótti. Uiym biyl baǵdarlamany 2018 jylǵa deiin uzartý usynysyn maquldady.
Eki tarap QR memlekettik organdarynyń EYDU-nyń komitetteri men jumys toptarynyń qyzmetine qatysý deńgeiin arttyrý boiynsha is-áreketter josparynyń tiimdiligin talqylady. Qazaqstannyń Bilim berý saiasaty jónindegi komitette «Qatysýshy» deńgeiine deiin jáne Qurysh komitetinde «Qaýymdastyrylǵan múshe» deńgeiine deiin óz mártebesin arttyrý jolynda sapaly jumystar júrgizip jatqany atalyp ótti.
Budan ózge, Qazaqstannyń EYDU-nyń Básekelestik jónindegi komitetine 2019–2020 jyldary tolyq quqyqty múshe retinde kirý máselesi talqylandy. Qazaqstandyq sarapshylar qazirgi tańda EYDU-nyń básekelestik máselesine qatysty barlyq usynystaryn engizý týraly belsendi jumystar júrgizip jatyr.
Kezdesý qorytyndysy boiynsha, taraptar ózara tyǵyz is-qimyldy odan ári jalǵastyrýǵa ázir ekenderin bildirdi.
Eske sala keteiik, 2015 jyldyń naýryz aiynda EYDU-men «QR monopoliiaǵa qarsy zańnamasy men saiasatyna sholý» júrgizý týraly kelisimge qol qoiylǵan. 2016 jylǵy 17 maýsymda Qazaqstan monopoliiaǵa qarsy zańnamasyndaǵy oń ózgeristerdiń arqasynda EYDU-nyń Básekelestik jónindegi komitetine qatysýshy retinde kirdi.
Al, jaqynda Astanada Baqytjan Saǵyntaev pen Anhel Gýrrianyń kelissózderi júrgizilip, onda Ekonomikalyq yntymaqtastyq jáne damý uiymymen yntymaqtastyqty keńeitý máseleleri talqylanǵan edi.
