Almatyda 3,5 aiǵa jetkilikti azyq túlik qory bar. Bul týraly búgin ákimdikte ótken brifing barysynda qala ákiminiń orynbasary Saparbek Tuiaqbaev aitty, dep habarlaidy QazAqparat.
Sheneýnik qala biliginiń azyq túlikpen qamtamasyz etý, jalpy biznes salasyn turaqtandyrý boiynsha is sharalary týraly aityp berdi.
«Bul jerde áleýmettik mańyzy bar azyq túlikpen qalany qamtý jumysy qolǵa alynyp jatyr. Jalpy qala turǵyndary aiyna 72 myń tonna azyq túlik tutynady. Qazir biz turaqtandyrý qory arqyly 18 myń tonna azyq túlik daiyndadyq. Onyń ishinde qant, mai, qaraqumyq, kókónis taýyq eti taǵy basqa azyq túlikterdi aitýǵa bolady.
Kórshi óńirlerdiń jáne qala óndirýshilerimen kelisimshart jasalyp, 3,5 ai ishinde qalany túgel qamtýǵa qor jabdyqtaldy. Onyń ishinde jeke kásipkerlerdiń saýda júieleri, logistikalyq kompaniianyń qorlary bar», - dedi Saparbek Tuiaqbaev.
Onyń aitýynsha, azyq-túlik satatyn dúkenderdiń saýdasy 2,5 ese ósken.
«Áleýmettik jelilerde kei aqparat taralyp jatyr. Keshe búginniń ózinde azyq túlik salasyndaǵy dúkenderdiń saýdasy 2,5 ese ósken. Bul kúndelikti bolatyn jaǵdai emes, 1-2 kúnde tynyshtalady. Degenmen qalanyń qoimasynda, saýda júielerinde 3,5 aiǵa jetkilikti taýar bar. Tapshylyq 1-2 saǵattyq tapshylyq. Óitkeni, adamdardyń kópshiligi qajettiliginen de kóp taýar satyp alyp jatyr. Qazir ol másele sheshilgen. Tiisti taýarlar bári der kezinde jetkizilip otyr», - dedi Saparbek Tuiaqbaev.
