Foto: ©️ Tengrinews.kz
Almatyda áieldiń basyn kesip, bazarǵa tastap ketken er adamǵa qatysty sot úkimi shyqty, dep habarlaidy "Ult aqparat".
"Qylmystyq ister jónindegi mamandandyrylǵan aýdanaralyq sotta Almaty qalasynda áieldiń basyn kesip alǵan I.-ǵa qatysty qylmystyq isti qaraý aiaqtaldy.
Tergeý organy oǵan QR Qylmystyq kodeksiniń 99-baby 2-tarmaǵynyń 5-bóligi, iaǵni asqan qatygezdikpen qasaqana kisi óltirý faktisi boiynsha aiyp taqty. Isti qaraýǵa alqabiler qatysty" - delingen qalalyq sot habarlamasynda.
Sottalýshy I. otbasylyq jáne ómirlik qiyn jaǵdaida bola otyryp, ózimen odan ári qarym-qatynasty jalǵastyrǵysy kelmeitin azamattyq jubaiyna materialdyq táýeldi bola tura, qoǵamda úreili, kriminogendik jaǵdaidy qalyptastyrý maqsatynda kisi óltirýge bel bailaǵan.
Ol naýryz aiynda qasaqana kisi óltirýdi aldyn ala josparlap, jábirlenýshi A.-ny is júzinde joq naýbaihanaǵa jumysqa ornalastyramyn degen jeleýmen qala saiabaqtarynyń birine kezdesýge shaqyrǵan. Sosyn I. asqan qatygezdikpen jábirlenýshiniń basyn kesip alǵan.
Budan keiin qoǵamda rezonans týdyrý maqsatynda jábirlenýshi A.-nyń basyn shujyq-irimshik satatyn dúkenderdiń birinde qaldyrý týraly sheshim qabyldaǵan.
"Prokýror sottan sottalýshyny kináli dep tanýdy jáne 20 jylǵa bas bostandyǵynan aiyrýdy, sondai-aq jazasyn qaýipsizdigi ortasha mekemede óteýin surady.⠀
Al sottalýshy kinásin tolyq moiyndady jáne jasaǵan isine shyn júrekten ókinish bildirdi.
Qylmystyq kodekske sáikes, asqan qatygezdikpen kisi óltirgeni úshin 15 jyldan 20 jylǵa deiingi merzimge bas bostandyǵynan aiyrý nemese ómir boiyna bas bostandyǵynan aiyrý, múlikti tárkileý nemese tárkilemeý jazasy qarastyrylǵan.
Alqabiler men sot úkimine sáikes, I. asqan qatygezdikpen qasaqana kisi óltirgeni úshin kináli dep tanyldy jáne oǵan qaýipsizdigi ortasha QAJ mekemesinde jazasyn ótei otyryp, 20 jyl bas bostandyǵynan aiyrý túrindegi jaza taǵaiyndaldy" - delingen habarlamada.
Úkim zańdy kúshine engen joq.
