Almatyda qart er adamdy uryp-soǵyp, tonap ketken kúdikti ustady, - dep habarlaidy Tengrinews.kz.
Qumash Telegram-arnasy Almatyda bolǵan qylmys týraly jazba jariialady. Onda áiel 13 jyl birge turǵan burynǵy zeinetker kúieýin nemere aǵasymen tonaǵany jazylǵan. Er adam tańerteń es-tússiz jatqan jerinen tabyldy.
"Aqshasyn jinaǵan er adam ony jumsap úlgermesten qaitys boldy. 65 jastaǵy zeinetker bir-eki kún komada jatyp, qaitys boldy. Bul týraly nemeresi aitty", - dep jazdy Qumash Telegram-arnasy.
Arna avtorlarynyń aitýynsha, qaraqshylar ustalyp, olardan 500 myń teńge tárkilengen, biraq áiel bul iske tek kýáger retinde ǵana qatysyp kóp uzamai bosatylǵan.
Almaty Politsiia departamentiniń baspasóz qyzmeti málimetinshe, 30 tamyzda Alataý aýdandyq politsiia bóliminde QR Qylmystyq kodeksiniń 106-baby 1-bóligi "Denege qasaqana aýyr ziian keltirý" boiynsha qylmystyq is tirkelgen.
Politsiia málimetinshe, 1983 jyly týǵan er adam izin sýytpai ustalǵan. Ol kinásin moiyndaǵan. Kúdikti PD ýaqytsha ustaý izoliatoryna qamaldy. 2 qyrkúiekte jábirlenýshi qaitys bolǵannan keiin is 106-baptyń 3-bóligi "Abaisyzda jábirlenýshiniń ólimine ákep soqqan nemese qylmystyq top jasaǵan densaýlyqqa aýyr ziian keltirý" boiynsha qaita saralandy.
Politsiia áiel de bul is boiynsha qylmystyq jaýapkershilikke tartylǵanyn habarlady. Tergeý jalǵasyp jatyr.
