Foto: Kazinform
Almaty qalasy Alataý aýdandyq sotynda 32 jastaǵy Darhan Ahmetjanovqa qatysty sot otyrysy ótti, — dep habarlaidy «Ult aqparat» Kazinform-ǵa silteme jasap.
Sot otyrysy barysynda oqiǵa kýágerleri shaqyrylyp, sózderi tyńdaldy. Kámeletke tolmaǵan jigittiń aitýynsha, avtobýs apaty kezinde aiaǵyn syndyryp alǵan.
«Men 47-shi avtobýsqa otyrdym. Qulaqqappen án tyńdap kele jattym. Bir ýaqytta bir jolaýshynyń júrgizýshige qarai júgirip bara jatqanyn baiqadym. Osydan soń avtobýs adamdardy qaqty. Men qulap qaldym, aiaǵymdy syndyrdym. Avtobýstyń ishinde shý shyqty. „Ne istep tursyńdar, kómektesińder“, — dep bireý aiqailady. Mine úsh ai ýaqyt ótti. Men kóp nárseni umyttym. Bir jolaýshynyń: „Júrgizýshige kómekteseiik“, — degeni esimde. Ol esin endi jinai bastaǵan edi. Men júre almadym, biraq, sonda bar kúshimdi jinap, tórt adam bolyp áieldi kóterip, jedel járdem kóligine apardyq. Qazir júrsem, aiaǵym áli aýyrady», — dedi jasóspirim.
Sot otyrysyna sondai-aq kýáger retinde «DýmanTrans» kompaniiasy direktorynyń orynbasary Manas Tazabekov shaqyryldy.
«Júrgizýshi Ermek Shókebaevaǵa qatysty jumysta eshqandai aryz-shaǵym bolǵan joq. Jumysqa kirer kezinde tiisti qujattaryn tapsyrǵan. Qatelespesem, 7-8 jyl kólik júrgizý tájiribesi bar… Negizi eshqandai jolaýshy júrgizýshini joldyń boiynda toqtatýǵa haqy joq. Nege deseńiz ol jerde adamnyń ómiri bar, odan bólek jol ústinde apatty jaǵdai týǵyzady. Júrgizýshi aialdamada toqtaǵan kezde jolaqyny alyp, biletti berýi kerek. Biraq, qozǵalys kezinde jol ústinde eshteńege alańdamaýy kerek. Jolaýshy jol ústinde avtobýsty toqtatýdy talap etken. Alaida, ol jerde toqtaýǵa eshqandai múmkindik bolmady. Birinshiden, toqtaityn jer joq, sebebi, ol kezde kópirdiń astynda ketip bara jatqan. Ekinshiden, onda úlken qozǵalys boldy. Júrgizýshi jol erejesin buzǵan bolar edi… Biz qaitys bolǵan adamdardyń otbasylaryna kómegimizdi kórsetkenbiz», — dedi avtoparktyń ókili Manas Tazabekov.
Júrgizýshi Ermek Shókebaevanyń anasy qaza tapqan adamdardyń týystaryna ne úshin advokat qajet bolǵanyn túsinbei dal bolýda.
«Olarǵa ne úshin advokat kerek? Meniń meniń qyzymda eshqandai advokat joq qoi. Men ózim qaitys bolǵandardyń otbasylaryna baryp, keshirim suraǵanmyn. Olar: „Sizdiń qyzyńyzdyń eshqandai kinási joq“ dep shyǵaryp salǵan. Al qazir mynadai istep otyr. Bárin sot sheshedi», — dedi Ermek Shókebaevanyń anasy.
Aita keteiik, avtobýsta júrgizýshi áieldi urǵan Darhan Ahmetjanovqa qatysty sot otyrysy taǵy da keiinge, osy joly 3 sáýirge shegerildi.
Buǵan deiin avtobýsta júrgizýshi áieldi urǵan Darhan Ahmetjanovqa qatysty sot otyrysy 20 naýryzda bastalǵan edi. Oǵan qatysty QR QK 293-baby (buzaqylyq) jáne QR QK 351-baby (eki jáne odan da kóp adamnyń ólimine ákep soqqan kóliktiń qaýipsiz jumysyn qamtamasyz etetin erejelerdi buzý) boiynsha aiyp taǵyldy. Alaida, Almaty qalasy Alataý aýdandyq soty sotttalýshynyń sotyn 26 naýryzǵa shegergen edi.
Eske salsaq, ótken jyly jeltoqsan aiynda Almatyda № 47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áieldi urǵan. Saldarynan áiel esinen tanyp, kólikti basqara almai, aialdamada turǵan bir top adamdy qaqqan.
Apat saldarynan 7 adam zardap shegip, 3 adam qaitys boldy.
Qaza tapqan úsh adamnyń ekeýi erli-zaiypty ustazdar bolǵan. Olardyń artynda 4 balasy qaldy.
Avtobýs jolaýshysy ustalyp, oǵan qatysty QR QK 293-baby (buzaqylyq) jáne QR QK 351-baby (eki jáne odan da kóp adamnyń ólimine ákep soqqan kóliktiń qaýipsiz jumysyn qamtamasyz etetin erejelerdi buzý) boiynsha qylmystyq is qozǵaldy. Sondai-aq ol eki aiǵa qamaýǵa alynǵan bolatyn.
