Almatyda dárigerler aýrýhananyń jansaqtaý bóliminen shyqqan órttiń aldyn aldy, dep habarlaidy "Ult aqparat" Almaty qalasynyń Tótenshe jaǵdailar departamentiniń baspasóz qyzmetine silteme jasap.
18 shilde kúni saǵat 21:47-de na Almaty qalalyq «101» pýltine Seifýllin dańǵyly, 492 mekenjaiynda ornalasqan № 1 perzenthananyń balalarǵa arnalǵan jansaqtaý bóliminen órt shyqqany týraly habarlama kelip túsken. Tótenshe jaǵdailar departamentiniń kúsh-quraldary dereý atalǵan mekenjaiǵa jiberildi.
«Jansaqtaý bóliminde órt sóndirý dabyly iske qosylǵany anyqtaldy. Bul túnde kezekshilik etken aýysym qyzmetkerleri sabyq saqtap, tótenshe jaǵdai kezinde áreket etýdiń algoritmine sáikes sharalar qoldandy. Osylaisha, akýsher-ginekolog dáriger Perizat Sadyqova, balalar medbikesi Arailym Jidelieva jáne basqa da qyzmetkerler jańa týǵan segiz náresteni jansaqtaý bóliminen qaýipsiz jerge shyǵarǵan.
Dárigerlerdiń biri – Vitalii Grýshevskii untaqty órt sóndirý quralyn durys paidalanyp, elektr symdar júiesiniń aiqas tuiyqtalǵan rozetkadan órtenýiniń aldyn aly. Qyzmetkerlerdiń daǵdylary jalyndy órt sóndirýshiler kelgenshe tolyq sóndirýge múmkindik berdi», - dep habarlady vedomstvodan.
Qalalyq Tótenshe jaǵdailar departamenti aýrýhana basshylyǵy men meditsina qyzmetkerlerine qyraǵylyq tanytyp, tek meditsinalyq kómekke emes, basqa jaǵdaida da kómekke kele alǵany úshin alǵys bildirdi.
Jalyndy sóndirýge atsalysqandardyń barlyǵy nagradaǵa usynylady. Qaza tapqandar men zardap shekkender joq.
