Birneshe aidan beri Almatydaǵy aýrýhanalardyń birinde turǵan balanyń ákesi tabyldy. Endi ol kishkentai Táńirbergenniń ákesi ekenin dáleldeý úshin DNQ tapsyrýy kerek.
Bul oqiǵa qoǵamda qyzý talqyǵa tústi, sodan keiin er adam bailanysqa shyqty. Onyń sózinshe, eki jasar balasynan bas tartpaǵan jáne ony aýrýhanadan alyp ketýge ýáde bergen. Alaida aldymen balanyń ákesi ekenin dáleldeýi qajet, dep habarlady Sputnik Qazaqstan agenttigi KTK telearnasyna silteme jasap.
"Bastapqyda balanyń qujaty bolmaǵandyqtan, endi ákesi ekenin dáleldeidi – bala ekeýinen DNQ saraptamasy alynady. Negizinen onyń balany alyp ketýge tolyq quqyǵy bar. Sebebi ákesi ata-ana quqyǵynan aiyrylmaǵan jáne oǵan qarsy eshkim aryz jazbaǵan. Eger ákesi ekenin dáleldese, balany alyp kete alady", - dedi Almaty qalasynyń №2 qalalyq klinikalyq balalar aýrýhanasynyń zańgeri Rústem Baltabaev.
Al oǵan deiin kishkentai Táńirbergen mamandandyrylǵan balalar úiinde turady. Qazir ony sol jaqqa aýystyrýǵa daiyndap jatyr. Baladan saraptama alyndy, sondai-aq koronavirýstyń bar-joǵyn da anyqtaidy.
Bala alǵashqy qujatyn – týý týraly kýálik aldy. Tek "ákesi" degen tusta syzyq qoiylǵan. Óitkeni bes aiǵa jýyq ýaqyt boiy balany izdep eshkim kelmegen. Dál sol ýaqyttan beri bir jarym jasar Táńirbergen aýrýhana palatasynda turdy.
Balanyń ákesi DNQ tapsyrýǵa daiyn.
"Jaǵdaiǵa bei-jai qaramaǵandarǵa alǵysym sheksiz, alaida ulymdy ózim tárbieleimin. Qazir qajetti qujattardy jinap, ony alyp ketýge daiynmyn. Qajet bolsa, DNQ testin tapsyramyn. Táńirbergenniń 100% meniń ulym ekenine senimdimin. Osy ýaqytqa deiin ai saiyn aýrýhanaǵa kelip júrdim. Dárigerler ony biledi", - dedi balanyń ákesi Meiirbek Tilepbaev.
Aýrýhanada qalǵan bala
Kishkentai sábidiń birneshe aidan beri aýrýhanada turyp jatqany týraly áleýmettik jeli arqyly belgili boldy. Balany aýrýhanada ákesi qaldyrǵan. Áke men bala qyrkúiekte politsiia qyzmetkerleriniń nazaryna ilikken – olar aýa raiyna sai kiinbei júrgen. Sol kezde er adamnyń turaqty turatyn jeri joq ekeni anyqtaldy. Al Almatyǵa Jambyl oblysynan tabys tabýǵa kelgen. Er adamnyń sózinshe, balanyń anasy ketip qalǵan.
Sodan keiin balany aýrýhanada qaldyryp, ákesi alyp ketýge ýáde bergen. Meditsinalyq mekemege eki ret kelip, balany balalar úiine bermeýdi suraǵan.
Aita keteri, buǵan deiin politsiia balanyń Jambyl oblysynda turatyn ájesin tapty.
