«Kelimsek» is-sharasy barysynda Almatyda 11 jyl boiy zańsyz turǵan Aýǵanstan azamaty anyqtaldy, dep habarlaidy "Ult aqparat".
Belgili bolǵandai, 30 jastaǵy sheteldik osy ýaqytqa deiin jasyrynyp júrgen, jalǵyz ómir súrip, eshkimmen bailanys jasamaǵan. Ol QR ÁQBtK-niń 517-baby boiynsha jaýapqa tartyldy.
Almaty qalalyq Politsiia departamenti Kóshi-qon qyzmeti basqarmasynyń bastyǵy Ashat Bútinshinov zańnamany óreskel buzǵan shetel azamaty 14 qańtarda bastalǵan «Kelimsek» aldyn alý is-sharasy kezinde anyqtalǵanyn aitty.
«Is-shara Qazaqstan Respýblikasynyń kóshi-qon zańnamasyn buzýdy anyqtaýǵa baǵyttalǵan. Reid kezinde sheteldikter baratyn nysandar, sondai-aq olar ýaqytsha turatyn oryndar tekserildi. 4 kún ishinde kóshi-qon jáne jergilikti politsiia qyzmetkerleri 629 sheteldikti tekserdi. Nátijesinde Qazaqstanda bolý erejesin buzǵany úshin 25 sheteldik ákimshilik jaýapkershilikke tartyldy. Jeke basyn anyqtaý úshin PD-niń qabyldap-taratýy ortalyǵyna 35 sheteldik ornalastyryldy. Sonymen qatar bizdiń otandastarymyzdyń ishinen olarǵa kómektesken 34 adam ákimshilik jaýapkershilikke tartyldy», – deidi ol.
Politsiia málimetteri boiynsha, jedel-aldyn alý sharasy barysynda jeke qujaty joq Resei Federatsiiasynyń 41 jastaǵy azamaty anyqtaldy.
«Tekserý is-sharalarynyń nátijesinde onyń Qazaqstan Respýblikasynyń aýmaǵyna 2010 jyly kelgeni jáne zańdy mártebesin áli rettemegeni belgili boldy. Sonymen qatar osy kúnderi Qazaqstan aýmaǵynda bes jyldan beri qujatsyz júrgen Ózbekstannyń eki azamaty anyqtaldy. Bul faktiler boiynsha qoldanystaǵy zańnamaǵa sáikes sharalar qabyldanyp jatyr», – dedi Ashat Bútinshinov.
