Almatyda áýejai men qoǵamdyq oryndarda baqylaý kúsheitildi, dep habarlaidy "Ult aqparat".
Álemdegi epidemiialyq jaǵdaidyń nasharlaýyn eskere otyryp, Almaty qalasynda koronavirýs infektsiiasynyń yqtimal ekinshi tolqynyna daiyndyqty qamtamasyz etý boiynsha keshendi sharalar iske asyrylýda.
Koronavirýs infektsiiasynyń taralýyn boldyrmaý úshin Almaty qalasynyń Halyqaralyq áýejaiynda shetelden keletin azamattarǵa turaqty túrde monitoring júrgiziledi. Maqsaty – ushyp kelgender azamattarda koronavirýs infektsiiasyna testiden ótkeni jónindegi anyqtamanyń bar-joǵyn anyqtaý jáne sáikes diagnostikany júrgizý úshin jedel oqshaýlaý.
«Osy jyldyń 12-13 qazany aralyǵynda shetelden Almaty qalasyna 1456 jolaýshysy bar 11 áýe reisi keldi. 207 jolaýshynyń anyqtamasy joq bolyp shyqty. COVID-19-ǵa test tapsyrǵany týraly anyqtamasy joq jolaýshylardyń bári qonaqúiler janynan qurylǵan karantindik statsionarlarǵa koronavirýs infektsiiasyna laboratoriialyq tekserý júrgizý úshin oqshaýlandyryldy», – delingen qalalyq ákimdik taratqan aqparatta.
Óz kezeginde, juqtyrýdy boldyrmaý maqsatynda qala aýmaǵynda karantin sharalarynyń buzylý faktilerin anyqtaýǵa jáne qaýipsizdiktiń sanitarlyq-epidemiialyq talaptarynyń odan ary oryndalýyn qamtamasyz etýge baǵyttalǵan 26 monitoringilik top jumys istep jatyr.
«Sonymen qatar, 12-13 qazan kúnderi karantin talaptarynyń saqtalýy boiynsha 243 tekserý sharalary júrgizildi. 27 nysanda tártip buzýshylyqtar anyqtaldy, maska rejimin buzǵany úshin QR ÁQBtK-niń 425-babynyń 1-tarmaǵy boiynsha 5 jeke tulǵa ákimshilik jaýapkershilikke tartyldy», – dep atap ótti ákimdik.
Sondai-aq, Almaty qalasynyń bas memlekettik sanitar dárigeriniń qaýlysyndaǵy talaptardy buzǵan nysandar anyqtaldy.
Olardyń ishinde: Maqataev kóshesi, 53 mekenjaiyndaǵy (Medeý aýdany) «Shans» bingo klýby, Rozybakiev kóshesi, 49 mekenjaiyndaǵy (Bostandyq aýdany) «Sansabil» dámhanasy, Bókeihanov kóshesi, 44 A mekenjaiyndaǵy «King Beer Halal Burgers» dámhanasy, Fedorov kóshesi, 24 mekenjaiyndaǵy (Jetisý aýdany) «Lýna» dámhanasy, 6 shaǵyn aýdandaǵy 3B úi mekenjaiyndaǵy «Dýel» kompterlik klýby, 6 shaǵyn aýdandaǵy 11 úi mekenjaiyndaǵy (Áýezov aýdany) «Monstr» kompiýterlik klýby bar.
