Foto: Aikyn.kz
Almaty máslihaty atmosferalyq aýany qorǵaý erejelerin bekitti, dep habarlaidy Ult.kz.
Qujat aýanyń lastaný deńgeiin kezeń-kezeńimen tómendetýge jáne ekologiialyq talaptardy júieleýge baǵyttalǵan. Jańa erejeler QR Ekologiialyq kodeksine sáikes ázirlengen.
2024 jylǵa júrgizilgen esepteýler bul sharalardyń ózektiligin kórsetti. Málimetke sáikes, Almaty aglomeratsiiasyndaǵy jalpy shyǵaryndylar kólemi 225 myń tonnany quraǵan.
Mamandardyń aitýynsha, aýany lastaityn negizgi kózder:
avtokólik quraldary;
statsionarlyq nysandar (óndiris oryndary, monshalar, qoǵamdyq tamaqtaný jáne qurylys obektileri);
jeke turǵyn úi sektory.
Jańa erejeler aiasynda avtoparkterge birqatar talaptar engiziledi. Atap aitqanda, qozǵaltqyshty uzaq ýaqyt qosyp turýǵa shekteý qoiylyp, shyǵaryndylardy tazartý júielerin ornatý jáne turaqty ekologiialyq baqylaý júrgizý mindetteledi. Sondai-aq kólik parkin jańartý jumystary aldymen Eýro-5 standartyna kóshý, keiinnen gaz jáne elektr kólikterin engizý arqyly kezeń-kezeńimen júzege asyrylmaq.
Sonymen qatar qala aýmaǵynda lastaýshy zattardyń tómen deńgeidegi aimaqtaryn (LEZ) kezeń-kezeńimen engizý josparlanyp otyr. Bul aimaqtarda gaz jaǵdaiy qolaisyz kezde kómir jaǵýǵa, qaldyq órteýge jáne pirotehnika qoldanýǵa tyiym salynady. Al generatorlar men arnaiy tehnikalar mindetti túrde tazartý júielerimen jabdyqtalýy tiis.
Bilik ókilderi qabyldanǵan sharalar Almatydaǵy ekologiialyq ahýaldy jaqsartýǵa jáne turǵyndardyń ómir súrý sapasyn arttyrýǵa baǵyttalǵanyn atap ótti.
