Almatyda arnaiy dabyldy qosyp, qala kóshelerinde júrgen kólik júrgizýshileri jaýapqa tartyldy, dep habarlaidy "Ult aqparat".
«Ótken aptada internet keńistigin baqylaý kezinde «Mercedes», «Toyota Camry» jáne «Cadillac Escalade» kólikteriniń júrgizýshileri jol erejelerin óreskel buzǵandyǵy anyqtaldy. Dereý anyqtaý sharalary júrgizilip, nátijesinde quqyq buzýshylar jaýapkershilikke tartyldy.
Atap aitqanda, «Mercedes-Benz» kóligin tizgindegen 2000 jyly týǵan A. esimdi azamat kóligine arnaiy jaryq jáne dybystyq dabyl berýge arnalǵan qurylǵyny zańsyz ornatqan. Ol jaqynda ustaldy. SMÝ alynyp tastaldy. Quqyq buzýshyǵa qatysty QR ÁQbK-niń 230-baby 2-bóligi, 592-bap 3-bóligi, 595-bap 1-bóligi, 601-bap 2-bóligi, 603-bap 2-bóligi boiynsha ákimshilik hattamalar jasaldy», – dedi Almaty qalalyq Politsiia departamentiniń ákimshilik politsiia basqarmasynyń bastyǵy Jandos Murataliev.
Osyndai zańbuzýshylyqqa «Cadillac Escalade» avtokóligin basqarǵan Almaty turǵyny – 2001 jyly týǵan J.azamatta barǵan. Ol da qurylǵyny arnaiy jaryq jáne (nemese) dybystyq dabyl berý úshin zańsyz paidalanǵan. Sonymen qatar, ál-Farabi dańǵylymen shyǵys baǵytta qozǵalǵan tártip buzýshy jol qozǵalysy erejeleriniń 2.4.3, 2.4.4, 7.13, 7.17 erejelerin buzdy, ol QR ÁQbK-niń 230-baptyń 2-bóligi, 590-baptyń 1,7,9-bóligi boiynsha ákimshilik jaýapkershilikke tartyldy.
«Aitpaqshy, saǵatyna 165 shaqyrym jyldamdyqty asyryp, áleýmettik jeli arqyly maqtanǵan «Toyota Camry» júrgizýshisine qatysty da ákimshilik sharalar qoldanyldy. Men jol qozǵalysyna qatysýshylarǵa jol erejelerin qatań saqtaý týraly qala joldaryndaǵy mádeniettiń deńgeiin kóterý jáne jazanyń bultartpas qaǵidaty týraly taǵy bir ret eske salǵym keledi. Sonymen qatar, men qoǵamdyq belsendilik tanytyp, zań buzǵan júrgizýshiler týraly habar berip, sol arqyly jalpy jol qaýipsizdigi máselelerine nemquraily qaramaityn azamattarǵa alǵys aitamyn», – dep qorytyndylady Murataliev.
