Foto: Almaty ákimdigi
Almatyda mádeniet, tarih jáne týrizmdi biriktiretin «Almatynyń tarihi jady» jobasy iske qosyldy, dep habarlaidy Ult.kz.
Endi 2GIS kartasynan kórnekti qazaqstandyqtardyń jerlengen oryndaryn, eskertkishter men memorialdardy, sondai-aq, belgili tulǵalardyń ómiri men shyǵarmashylyǵyna bailanysty kóshelerdi tabýǵa bolady. Týristik baǵyttar boiynsha arnaiy marshrýt qurý múmkindigi de qoljetimdi.
"Joba ziiarat mádenietine – kórnekti tulǵalardyń qabirine qurmetpen barý dástúrine erekshe mán beredi. Ortalyq zirat, Keńsai-1 jáne Keńsai-2 ashyq aspan astyndaǵy mýzei retinde tsifrlyq marshrýtqa engizildi. Derekqorǵa Uly Otan soǵysy ardagerlerin qosqanda 383 jerleý orny tirkelgen", - delingen habarlamada.
Joba sondai-aq, mádeni murasy bai kóshelerdi de qamtidy. Mysal retinde jazýshylar, ǵalymdar men mádeniet qairatkerleri turǵan Tólebaev kóshesin aitýǵa bolady.
Joba qala sarapshylary men mýzeileriniń birlesken jumysy nátijesinde júzege asyryldy.
