Foto: Almaty qalasy ákimdigi
Qazaqstan Respýblikasynyń Premer-ministri Oljas Bektenovtiń tapsyrmasy aiasynda Almatyda áleýmettik mańyzy bar azyq-túlik taýarlarynyń baǵasyn baqylaý jáne turaqtandyrý boiynsha keshendi jumystar qolǵa alyndy.
Biyl 16 sáýirden bastap «Barys-4» bazaryndaǵy kóterme saýda naryǵynda baǵaǵa júieli monitoring júrgizilip keledi. Bul jumysqa Almatynyń Kásipkerlik jáne investitsiialar basqarmasy, Saýda jáne tutynýshylardyń quqyǵyn qorǵaý departamenti, Memlekettik kirister departamenti, sondai-aq Básekelestikti qorǵaý jáne damytý agenttiginiń departamenti tartylǵan.
Is-sharalardyń negizgi maqsaty — baǵa turaqtylyǵyn qamtamasyz etý jáne azyq-túlik baǵasynyń negizsiz ósýine jol bermeý. Shekti saýda ústemesin (15%-dan aspaityn) saqtaý jáne jetkizý tizbegindegi tiimsiz deldaldyq býyndardy qysqartý máselesine erekshe nazar aýdarylady.
Sonymen qatar, kásipkerlermen jáne bazar ákimshiligimen túsindirý jumystary júrgizilip jatyr. Saýda-sattyqqa qatysýshylarǵa zańnama talaptary, baǵa belgileýdiń ashyqtyǵy, sondai-aq qoljetimdi ári durys rásimdelgen baǵa belgileriniń bolýy qajettigi túsindirilip keledi.
Foto: Almaty qalasy ákimdigi
Buzýshylyqtar anyqtalǵan jaǵdaida Qazaqstan Respýblikasynyń zańnamasyna sáikes memlekettik baqylaý sharalary qabyldanady.
Monitoring qorytyndysy boiynsha materialdar óńirlik komissiiada qaralady. Quqyq buzýshylarǵa qatysty tiisti ákimshilik sharalar qoldanylady.
Bul baǵyttaǵy jumys jalǵasyp otyr ári jiti baqylaýda. Onyń nátijesi qosymsha habarlanady.
