Almatyda eki áiel «áleýmettik qyzmetkermiz» dep qarttardy aldap, aqshalaryn urlap ketip otyrǵan, dep habarlaidy "Ult aqparat".
38 jastaǵy áielder «áleýmettik járdemaqy ákeldik» dep zeinetkerlerdi aldap, úiine kiretin bolǵan.
Alaiaqtar zeinetkerlerdi áleýmettik tólemderge 6 myń teńge kóleminde járdemaqy qosylady dep sendirgen.
«Olar shynymen aqshany bergen. Aqsha bergen kezde qaskóiler qasaqana 10 myń nemese 20 myń teńge kóleminde iri aqshany usynǵan. Sodan keiin zeinetker qaitarym aqsha berý úshin óziniń «jasyryn» jerine barǵan. Ári qarai «qonaqtar» densaýlyǵyn tekserip, qysym ólsheýge keńes beredi. Muny isteý úshin tonometr men stetoskopty ózderimen birge alyp júrgen. Áielderdiń biri egde jastaǵy adamdardyń qysymyn ólshep, sózge ainaldyrsa, ekinshisi aqsha salynǵan jerdi tazalap ketip otyrǵan», – dedi Bostandyq aýdandyq PB janyndaǵy politsiia bóliminiń basshysy Ǵalym Qasymbaev.
Áielder 92 jastaǵy qariianyń jyldar boiy jinaǵan 1 million 200 myń teńgesin alyp ketken.
Qazir kúdiktiler ustaldy. Aita ketý kerek, kúdiktilerdiń biri buryn alaiaqtyq úshin jaýapqa tartylǵan. Qazir QR Qylmystyq kodeksiniń 188-baby boiynsha sotqa deiingi tergeý júrip jatyr. Ázirge olardyń 5 qylmystyq oqiǵaǵa qatysy bary anyqtaldy.
«Biraq naqty kórsetkish áldeqaida joǵary bolýy múmkin. Osyǵan bailanysty bul adamdardyń zańsyz áreketterinen zardap shekken azamattardan 298-52-80 jáne 298-52-82 nómirlerine habarlasýlaryn suraimyz», – dedi Qasymbaev.
