Almatydaǵy «Balýan Sholaq» sport saraiynda QR Tuńǵysh Prezidenti kúnine orailastyrylǵan Qazaq kúresinen absoliýttik «Álem barysy» álem chempionaty bastaldy, dep habarlaidy QazAqparat.
Qazaqstan telearnasynyń tikelei efirinen kórsetilip jatqan chempionattyń dál qazirgi ýaqytta jerebe tartý rásimi ótip jatyr. Tórtinshi ret ótetin básekege 30 elden 33 balýan qatysady. «Álem barysy» atanýǵa AQSh, Aýstraliia, Ázerbaijan, Braziliia, Grekiia, Grýziia, Úndistan, Iran, Ispaniia, Italiia, Kamerýn, Kongo, Koreia, Kýba, Qyrǵyzstan, Litva, Mońǵoliia, Niderlandy, Pákistan, Polsha, Resei, Sloveniia,Tájikstan, Túrikmenstan, Túrkiia, Ózbekstan, Ýkraina, Estoniia, Iaponiia sekildi elderdiń jáne Qazaqstannyń ataqty balýandary kelgen.
Bul synda elimizdiń namysyn A.Nuǵymarov (ShQO), R.Ábdirazaqov (Almaty qalasy), M.Isaǵabylov (Qyzylorda oblysy), N.Jarylǵapov (Mańǵystaý oblysy) syndy balýandar qorǵaidy.
Chempionat Qazaqstannyń tarihi jáne mádeni murasyn damytý, shet elderde qazaq kúresin damytý barysyndaǵy yntymaqtastyq pen ózara bailanysyn nyǵaitý, qazaq kúresin halyqaralyq deńgeide odan ári jetildirý, nasihattaý jáne bedelin kóterý, qazaq kúresinen «Álem barysyn» anyqtaý úshin ótkiziledi.
«Álem barysy» chempionatynyń biylǵy júlde qory 20 million teńge. Jeńimpaz atanǵan balýanǵa 10 mln teńge jáne altyn belbeý, ekinshi oryn iegerine 6 mln teńge jáne úshinshi oryn iegerine 3 mln teńge, sáikesinshe kúmis jáne qola belbeýlermen marapattalady. Al, «Jeńiske degen jigeri úshin» atanǵan sportshyǵa 1 mln teńge beriledi. Sondai-aq, jyldaǵy dástúrge sai jankúierler arasynda avtokólik oinatylady.
