Almatyda «Ál-Farabi – Abai: rýhani sabaqtastyq máselesi» atty respýblikalyq ǵylymi – tájirbielik dóńgelek ústel ótti, dep habarlaidy QazAqparat.
Sharany ál-Farabi ortalyǵy men ál-Farabi atyndaǵy QazUÝ-dyń filosofiia jáne saiasattaný fakýlteti uiymdastyrdy.
Dóńgelek ústel barysynda Uly tulǵalardyń ómiri men mádeni shyǵarmashylyǵyna qatysty ǵylym men bilim berýdiń ádisnamalyq jáne praktikalyq máseleleri talqylandy.
Ál–Farabi ortalyǵynyń ǵylymi keńesshisi Jaqypbek Altaevtyń aitýynsha, ál–Farabi de, Abai da – eń aldymen ustaz, aǵartýshylar. Olardyń búkil izdenisteri men paiymdaýlary adamdy barynsha kemeldendirý, damytý maqsatyna arnalǵan. Ál–Farabi adamdardy shynaiy baqytqa jetkizý joldaryn murat tutsa, Abai tolyq, kemel adam tárbielep shyǵarýdy maqsat etken.
«Ál-Farabi men Abai intellektýal. Aralarynda myń jyldyq aiyrmashylyq bolsa da, olardyń oilarynda, pikirlerinde, kózqarastarynda kóp uqsastyq bar. Sebebi, ekeýi de uly adamdar. Árine, bul jerde Farabi Abaidy oqytty dep aitýǵa bolmaidy, bizde dálel joq. Biraq, ondai oi nege keldi. Abai Sokratty, Platondy, Aristoteldi oqydy. Al, ál–Farabi antikalyq filosoftardyń eńbekterine túsinikteme jazǵan adam. Olardyń etnikalyq kózqarastary da óte uqsas. Mysaly baqyt pen din jaǵynan oilary bir jerden shyqqan», – deidi Jaqypbek Altaev.
Dóńgelek ústel jumysyna farabitanýshy, abaitanýshy ǵalymdar men qoǵam qairatkerleri, ǵylymi qyzmetkerler, doktoranttar, magistranttar qatysty.
