Almatyda bashqurt aqyny Mustai Kárimniń qurmetine arnalǵan kóshe ashyldy, dep habarlaidy QazAqpart tilshisi.
Mamyr-4 yqsham aýdanyndaǵy burynǵy Sadovaia kóshesi, biyl 100 jasqa tolǵan uly aqyn Mustai Kárimniń esimimen atalatyn boldy.
Ashylý saltanatynda Almaty qalasynyń ákimi Baqytjan Saǵyntaev, QR Sport jáne mádeniet ministri Aqtoty Raiymqulova, bashqurt eliniń aqyny, jazýshy, dramatýrg M.Kárimovtiń nemeresi Temirbolat Kárimov quttyqtaý sóz sóiledi.
«Endi Mustai Kárimniń aty bizdiń elimizdiń mádeniet tarihynda máńgilikke jazyldy. Bul - baýyrlas Bashqurt halqynyń jarqyn ókiliniń bai shyǵarmashylyq murasyna, joǵary ádebi sheberligine degen qurmet. Mustai Kárim - uly aqyn, jazýshy, jýrnalist, kórnekti qoǵam qairatkeri. Ol álemdik ádebietke úlken úles qosty. Onyń shyǵarmashylyǵy tek qana Bashqurt halqynyń ǵana emes, búkil túrki áleminiń rýhani murasy bolyp tabylady jáne kitaptary álemniń ondaǵan tiline aýdarylǵan. Almatydaǵy búgingi is-shara Qazaqstan men Resei, Bashqurtstan jáne Almaty arasyndaǵy mádenietaralyq qatynastardyń damýyna úlken serpin beretinine senimdimin. Osy mańyzdy sharamen bárińizdi quttyqtaimyn», - dedi Almaty qalasynyń ákimi Baqytjan Saǵyntaev.
Jazýshynyń nemeresi, «Mustafa Kárim» qorynyń negizin qalaýshy Temirbolat Kárimov biylǵy jyl onyń otbasy úshin erekshe ekenin atap ótti.
«Mustai Kárim Qazaqstandy jaqsy kórdi. Ol Almatyǵa kelgendi unatatyn. Sebebi onyń kóptegen dostary, jazýshy, aqyndar osy qalada turdy. Olardy baýyrlastyq qarym-qatynastarmen, oqyrmandarǵa degen úlken jaýapkershilik bailanystyrdy. Talant azdyq etedi. Aqynyń júregi taza, oqyrmanǵa degen yqalasy zor bolýy qajet. Mustai Kárim bul qasietterdi Muhtar Áýezovten úirendi. Qazaqtyń zańǵar jazýshysymen ol Máskeýde kezdesti, sondai-aq Sábit Muqanov, Ǵabit Músirepov pen onyń maidandas dosy Ábý Sársenbaevtan sabaq aldy», - dedi ol.
Onyń poeziiasy, prozasy, dramatýrgiiasy qazaq tiline aýdaryldy. Bul igi ispen qazaqstandyq dostary Juban Moldaǵaliev, Sherhan Murtaza ainalysty. Búginde Mustai Kárimniń shyǵarmalary qazaq oqyrmandarynyń júreginen oryn aldy.
«Ol qazaq halqynyń tazalyǵy men keńdigine tánti bolatyn. Onyń qazaqstandyq oqyrmandarǵa alǵysy sheksiz edi. Sábit Dosanov Mustai Kárim qaitys bolǵannan keiin kóp uzamai, ol týraly: «Ulylar qaityp kelý úshin ketedi» degen maqala jazdy. Búgin aqynnyń jany bizben birge. Ol árdaiym ásem, ádemi qalaǵa oralýdy armandady. Sizderge úlken rahmet, - dedi Temirbolat Kárimov.
Aita keteiik, is-sharaǵa QR-nyń RF Tótenshe jáne Ókiletti Elshisi Imanǵali Tasmaǵambetov, sondai-aq Qazaqstan men Reseidiń aqyn-jazýshylary, etnomádeni birlestikter men jastar uiymdarynyń ókilderi qatysty.
