Almatyda Tóle bi kóshesindegi saýda úiiniń aldyndaǵy sirek kezdesetin aǵashtardy kesip tastaǵan kúdikti anyqtaldy, dep habarlaidy "Ult aqparat".
«Sarapshy mamandar kesilgen aǵashtardyń Qazaqstannyń Qyzyl kitabyna engen emen aǵashy ekenin anyqtady. Bul, aǵashtardyń sirek kezdesetin jáne azaiyp bara jatqan túri, erekshe ósimdik. Ol joiylyp ketýdiń aldynda tur», - dedi onlain brifing barysynda Almaty qalalyq Jasyl ekonomika basqarmasynyń bastyǵy Natalia Livinskaia.
Almaty qalalyq Politsiia departamenti bastyǵynyń orynbasary Rýstam Ábdirahmanovtyń aitýynsha, buǵan deiin sotqa deiingi tergep-tekserý QR Qylmystyq kodeksiniń 340-baby boiynsha júrgizilse, endi ol 339-baptyń 2-bóligine (sirek kezdesetin jáne quryp ketý qaýpi tóngen ósimdik túrlerin zańsyz qurtý) aýystyryldy.
«Biz bul qylmysqa qatysy bar barlyq adamdardy anyqtaimyz. Basty kúdikti anyqtaldy. Ol Almaty qalasynyń turǵyny. Ol - aýmaqty abattandyrý boiynsha kelisimshartqa otyrǵan jáne 10 jumysshy jaldaǵan JK basshysy. 11 aǵash zańsyz otalǵan, onyń 9-y Qyzyl kitapqa engen. Qazir birqatar saraptamalyq zertteýler taǵaiyndaldy. Tergeýshi barlyq ýákiletti organdarǵa tiisti sýraýlar joldady. Qylmystyq is tergeý satysynda», - dedi Rýstam Ábdirahmanov.
Sonymen qatar, ol Sulpak kompaniiasynyń da jaýapkershiligi qarastyrylyp jatqanyn atap ótti. Óitkeni aýmaqty abattandyrý boiynsha kelisimshart osy kompaniiamen jasalǵan.
Eske sala ketsek, 23 qarashaǵa qaraǵan túni Almatyda saýda úiiniń janynda (Áýezov-Tóle bi kósheleriniń qiylysy) jaiqalǵan emen men qaraǵash otaldy. Buǵan qatysty turǵyndar áleýmettik jelide narazylyq bildirdi.
Keiin Almaty qalalyq Jasyl ekonomika basqarmasy saýda úiiniń aldyndaǵy aǵashtardyń jappai kesilýiniń mán-jaiyn anyqtady.
Bul jaǵdaiǵa Prezident Qasym-Jomart Toqaev nazar aýdaryp, Almaty ákimi Baqytjan Saǵyntaevqa qyzmettik tekserý júrgizýdi, kinálilerdi jaýapkershilikke tartýdy tapsyrdy.
24 qarasha kúni B.Saǵyntaev máseleni óz baqylaýyna alǵanyn málim etti.
Almaty prokýratýrasy zańsyz aǵash kesý faktisi boiynsha tergeý júrgizýde.
