Foto: QR Mádeniet jáne aqparat ministrligi
Almaty qalasynyń «Dostyq úiinde» qazaq ádebietiniń qaitalanbas sýretkeri, Halyq jazýshysy Ábdijámil Nurpeiisovtyń 100 jyldyǵyna arnalǵan «Álem tanyǵan Ábdijámil» atty halyqaralyq ǵylymi-tájiribelik konferentsiia ótti, dep habarlaidy Ult.kz QR Mádeniet jáne aqparat ministrligine silteme jasap.
Is-sharaǵa Memleket basshysynyń tapsyrmasy boiynsha QR Mádeniet jáne aqparat ministri Aida Balaeva qatysyp, Prezident Qasym-Jomart Toqaevtyń quttyqtaý hatyn oqyp berdi.
«Sóz óneriniń sardary sanaly ǵumyryn ultynyń dúnietanymyn baiytýǵa arnady. Ádebiet álemine qubylys bolyp engen suńǵyla sýretker qazaq prozasyna erekshe qoltańbasyn qaldyrdy. Kózi tirisinde-aq klassik atanǵan jazýshy qalamgerlerdiń jańa býynyna úlgi-ónege kórsetip, ózindik mektebin qalyptastyrdy. Ábeńniń ár týyndysynan týǵan jerge degen riiasyz súiispenshiligi aiqyn kórinedi. Onyń «Qan men ter», «Sońǵy paryz» sekildi romandaryn óz zamanynyń ainasy deýge bolady. Aral arqyly qazaqtyń, qazaq arqyly barsha adamzattyń máselesin kótergen bul shyǵarmalar – álem órkenietine qosylǵan qundy qazyna», – delingen quttyqtaý hatta.
Foto: QR Mádeniet jáne aqparat ministrligi
Óz sózinde Aida Balaeva qalamgerdi eske alýǵa arnalǵan is-sharanyń mańyzyn atap ótti.
«Prezident atap ótkendei, Ábdijámil Nurpeiisov – qazaq ádebietin álemdik deńgeige kótergen tulǵa. Bul sózimizge onyń shet tilderge aýdarylǵan shyǵarmalary, álem oqyrmandarynyń joǵary baǵasy dálel bola alady. Búgingi konferentsiia jazýshynyń shyǵarmashylyǵyn jańa qyrynan zerdeleýge jol ashady degen úmittemin», – dedi ministr.
Sondai-aq, jazýshynyń júz jyldyq mereitoiyna orai elimizdiń barlyq óńirinde irgeli is-sharalar, ádebi keshter uiymdastyrylǵanyn aitty. Keiingi úsh aidyń ózinde óńirlerde 50-ge tarta is-shara ótti. Basylym betterinde qalamgerdiń ómiri men shyǵarmashylyǵy týraly 200-den astam maqala jaryq kórip, telearnalardan «Oryndalmaǵan amanat», «Abyz ǵumyr» atty derekti filmder jáne túrli siýjetter kórsetildi.
Foto: QR Mádeniet jáne aqparat ministrligi
Halyqaralyq ǵylymi-praktikalyq konferentsiiaǵa Qazaqstan Jazýshylar odaǵynyń tóraǵasy Mereke Qulkenov, Halyqaralyq TÚRIKSOI uiymynyń Bas hatshysy Sultan Raev, kórnekti memleket jáne qoǵam qairatkerleri, aqyn-jazýshylar, mádeniet-óner ókilderi qatysty.
Konferentsiia aiasynda Ábdijámil Nurpeiisovtiń turǵan úiine ilingen eskertkish taqtanyń jáne Dostyq úiinde fotokórmeniń ashylýy ótti.
