Ál-Farabi atyndaǵy QazUÝ jáne Abaidyń «Jidebai-Bórili» memlekettik qoryq-mýzeiiniń uiymdastyrýymen ýnversitet qabyrǵasynda Abaidyń 175 jyldyq mereitoiyna arnalǵan «Abai álemi» atty kórme ashyldy, dep habarlaidy QazAqparat.
Kórme ál-Farabi atyndaǵy QazUÝ-degi Abai zalyna qoiyldy. Onda Hakim Abaidyń shyǵarmashylyǵy, ósken ortasy, ómir súrgen zamany týraly málimetter men uly aqyn ómirinen syr shertetin asa baǵaly aqparattar bar.
Sonymen qatar, kórermender nazaryna 1885 jyly Tarihi ólketaný mýzeiine Abai Qunanbaiulynyń óz qolymen tabystaǵan asa qundy jádigerleri usynyldy. Abai mýzeiiniń qoryndaǵy aqynnyń túpnusqa eki fotosýretin, arhivtik qujattar men qoljazbalaryn tamashalaýǵa bolady.
«Búgingi tańda mýzeidiń negizgi qorynda 11 myńnan asa eksponat bar. Solardyń arasynda Abaidyń beinesi bar eki fotosýret, P.D.Lobanovskiidiń aqynnyń kózi tirisinde qaryndashpen salǵan portreti, Abaidyń 1896 jyly uly Maǵaýiiaǵa jazǵan haty, 1885 jyly N.I.Dolgopolov arqyly Semeidegi ólketaný mýzeiine tapsyrǵan zattar, Máskeý, Leningrad, Omby, Tom, Qazan qalalarynyń jáne Qazaqstan muraǵattarynan tabylǵan Abaidyń ómiri, atqarǵan qyzmeti, týystary men zamandastaryna qatysty arhiv derekteri, Abai oqyǵan medreseniń arab, túrik, shaǵatai tilderindegi kitaptary mýzeidiń baǵa jetpes qundy dúniesi», - deidi Abaidyń «Jidebai– Bórili» memlekettik qoryq-mýzeiiniń ǵylymi hatshysy Raýshan Elekenova.
Uiymdastyrýshylardyń aitýynsha, kórmeniń basty maqsaty – Abaidyń dúnietanymyn jáne onyń rýhani murasyn jastarǵa keńinen nasihattaý.
