Almaty ataýly áleýmettik kómekti (AÁK) berýdiń jańa tetikteri týraly aityldy, dep habarlaidy QazAqparat.
Qalalyq áleýmettik ál-aýqat basqarmasy basshysynyń orynbasary Daniiar Álkebaiulynyń aitýynsha, áleýmettik kómek kórsetýdiń jańa tásilderine sáikes, kóp balaly otbasylardy jeke sanatqa shyǵarý jáne olarǵa kepildendirilgen járdemaqy berý josparlanǵan. Bul járdemaqyny tóleý otbasynyń tabysyna bailanysty bolmaidy. Ol barlyq kóp balaly otbasylarǵa tólenedi, iaǵni 4 nemese odan da kóp kámeletke tolmaǵan balasy bar.
Járdemaqynyń mólsheri balalar sanyna qarai saralanady, ár balaǵa orta eseppen 10-11 myń teńge, bul 2018 jyldan bastap taǵaiyndalýy toqtatylǵan járdemaqyǵa qaraǵanda 4-7 ese kóp.
Otbasynyń árbir múshesine AÁK mólsheri jan basyna shaqqandaǵy ortasha kirisi men eń tómengi kúnkóris sheginiń 70 paiyzy arasyndaǵy aiyrma retinde anyqtalady. Sonymen birge tabysy joq otbasylar járdemaqyny biylǵy jyldaǵydai alady.
«Ataýly áleýmettik kómektiń eń basty sharttarynyń biri - eńbekke jaramdy otbasy músheleri jumys isteýi tiis jáne otbasy úshin jaýapty bolýy kerek. AÁK-niń shartty aqshalai túrindegi kómek jumyssyz azamattarǵa tólenedi. Alaida az qamtylǵan otbasylardyń jumyssyz azamattary «Eńbek» baǵdarlamasyn paidaǵa asyrýy tiis», - dedi ol.
Eger otbasynyń eńbekke qabiletti múshesi usynylǵan jumyspen qamtý sharalarynan bas tartsa, onda ol jáne onyń otbasynyń barlyq múshesi ataýly áleýmettik kómek alý quqyǵynan aiyrylady.
Al, kepildendirilgen paket barlyq AÁK alýshylarǵa, sonyń ishinde balalaryna materialdyq qoldaý kórsetiledi.
