Almaty qalalyq Áleýmettik ál-aýqat basqarmasy basshysynyń orynbasary Daniiar Álkebaiuly ataýly áleýmettik kómekti zańsyz alǵan otbasylar aqshany memleketke qaityryp jatqanyn jetkizdi, dep habarlaidy QazAqparat.
«AÁK alatyndarǵa tamyz-qyrkúiek ailary tolyq tólendi. Oǵan kepildik bere alamyn. Búgingi tańda áleýmettik kómekti zańsyz alǵandar aqshany memleketke qaitaryp jatyr. Naqtyraq aitsam, 3,4 million teńge keri qaitaryldy. Bastapqyda eskertý jasaimyz, adamdarǵa kiristerin jasyrǵandyqtaryn aityp, zańsyz alǵan aqshany memleketke qaitaryp berýi tiistigin túsindiremiz. Sodan keiin sanaimyz, somasyn aitamyz. Óz erkimen qaitarǵandarǵa túbirtek beriledi. Eger bul óz erkimen jasalmasa, onda barlyq materialdar sotqa jiberiledi», - dedi ol.
Búgin ótken brifingte aitylǵan málimetterge súiensek, Almatyda 11 myńnan astam otbasyǵa AÁK taǵaiyndalǵan. Alaida, qaita tekserýdiń nátijesi boiynsha 634 januiaǵa tólemder toqtatyldy. Sebebi, olardyń turmystyq jaǵdaiy kedeilik sheginen asyp ketken.
«Sonymen qatar, qalada turmaityn balalardy anyqtadyq. Bilim ministrliginiń habarlaýynsha, olar elimizdiń basqa aimaqtarynda bilim alýda. Sondyqtan biz Qazaqstannyń ózge oblystarynda bilim alatyn 597 balaǵa tólemaqyny toqtattyq. Sondai-aq, AÁK alatyn jeke kásipkerlermen de jumys júrgizildi. Olardyń ishinde 186 jeke kásipkerdiń tabysyn eskere otyryp, AÁK tóleýdi toqtattyq», - dep atap ótti Daniiar Álkebaiuly.
Buǵan deiin, ol AÁK tóleýdiń jańa tetikteri týraly aitqan bolatyn.
