Almatyda koronavirýstyń bar-joǵyn anyqtaityn PTR-testiniń 9 myńnan astam danasyn zańsyz satqandar ustaldy, – dep habarlaidy QR Qarjy ministrligi Qarjy monitoringi komiteti.
Atalmysh komitettiń Almaty qalasy boiynsha Ekonomikalyq tergeý departamentiniń qyzmetkerleri qalalyq Politsiia departamenti jáne MKD qyzmetkerlerimen birge 7 shilde kúni jedel-izdestirý sharalaryn ótkizip, koronavirýsqa PTR-testilerdi satqan adamdardy ustaǵan. Olarda kásipkerlik qyzmetpen ainalysýǵa ruqsat qujattary bolmaǵan.
«Ustalǵan tulǵalar jalpy somasy 32 900 000 teńgege 7000 PTR-testini zańsyz satpaq bolǵany anyqtaldy. Tekseris barysynda avtokólikten QHR óndirilgen taǵy 2225 PTR-testi anyqtalyp, tárkilendi. Qazirgi tańda atalǵan fakti boiynsha QR QK-niń 214-baby 1-bóligine (zańsyz kásipkerlik) sáikes sotqa deiingi tergeý isi qozǵaldy», - delingen aqparatta.
Aita keteiik, QR Prezidenti Qasym-Jomart Toqaevtyń tapsyrmasymen barlyq óńirde dári-dármekterdiń baǵasyn qymbattatý faktilerin anyqtaý boiynsha reidter ótkizilýde.
